16 мая спецыяльна для студэнтаў кафедры класічнай філалогіі Беларускага дзяржаўнага ўніверсітэта спецыялісты навукова-даследчага аддзела кнігазнаўства правялі тэматычныя заняткі “Грэчаская друкаваная кніга ў фондзе Нацыянальнай бібліятэкі Беларусі”.
Як Пятрарка і Бакача, якія стаялі ля вытокаў Адраджэння і зноў адкрылі класічную літаратуру для еўрапейскага чытача, так кафедра класічнай філалогіі БДУ сёння падагравае цікавасць да антычнасці ў сучасных студэнтаў.
У фондзе бібліятэкі захоўваецца каля 80 старадрукаваных кніг на грэчаскай мове. Выданні вельмі разнастайныя па змесце – сачыненні антычных аўтараў, слоўнікі, падручнікі, кнігі навуковага і рэлігійнага характару. Асноўную частку калекцыі складаюць творы антычных аўтараў, выпушчаныя ў эпоху Адраджэння, калі класічная літаратура мела велізарную папулярнасць. У зборы сустракаюцца экзэмпляры цалкам на грэчаскай мове, а таксама з паралельным перакладам на лацінскую і іншыя мовы.
На арыгінальных прыкладах студэнты пазнаёміліся з гісторыяй грэчаскай друкаванай кнігі ад эпохі Адраджэння і да ΧΙΧ стагоддзя, яе тэматычнай разнастайнасцю, змаглі паспрабаваць сябе ў ролі бібліёграфаў і вучыліся чытаць тытульныя старонкі выданняў на грэчаскай і лацінскай мовах.
