25 сакавіка ў бібліятэцы прайшла міжнародная канферэнцыя “Агульная гісторыя яднання народаў. Роля лідараў Казахстана і Беларусі ў станаўленні і развіцці незалежных дзяржаў”
Арганізатарамі форуму выступілі Цэнтр казахскай мовы, гісторыі і культуры імя Абая (Беларускі нацыянальны тэхнічны ўніверсітэт), Цэнтр мовы і культуры “Беларусь” (Еўразійскі нацыянальны ўніверсітэт імя Л.М. Гумілёва, Казахстан), Нацыянальная бібліятэка Беларусі, Навуковая бібліятэка БНТУ пры падтрымцы Пасольства Рэспублікі Казахстан у Рэспубліцы Беларусь.
Вітаў удзельнікаў міжнароднай канферэнцыі дырэктар Нацыянальнай бібліятэкі Беларусі Раман Матульскі. Ён адзначыў сімвалізм правядзення форуму ў галоўнай бібліятэцы краіны, дзе праходзіла нямала мерапрыемстваў, значных для казахска-беларускіх адносін.
Прарэктар па навуковай і інавацыйнай рабоце БНТУ Фёдар Раманюк выразіў надзею, што выказаныя ўдзельнікамі канферэнцыі ідэі будуць запатрабаваны грамадскасцю Казахстана і Беларусі, а сам форум паслужыць умацаванню дружбы паміж народамі.
Перад удзельнікамі міжнароднага сходу выступілі таксама Надзвычайны і Паўнамоцны Пасол Рэспублікі Казахстан у Рэспубліцы Беларусь Ергалі Булегенаў і галоўны спецыяліст упраўлення міжнароднага супрацоўніцтва Міністэрства адукацыі Рэспублікі Беларусь Андрэй Красуцкі.
У рамках канферэнцыі прайшлі пленарныя і секцыйныя пасяджэнні, на якіх удзельнікі выступілі з дакладамі пра розныя галіны ўзаемадзеяння Беларусі і Казахстана.