Нацыянальная бібліятэка Беларусі атрымала ў падарунак каштоўныя выданні з калекцыі княгіні Антоніі Радзівіл. Кнігі перадала відны славіст, папулярызатар беларускай культуры ў Швейцарыі Моніка Банькоўскі.
Фонд бібліятэкі папоўнілі двухтомнік “Souvenirs du general Cte Fleury” (Парыж, 1897–1898) і выданне “Mgr. Dupanloup...” Emile Faguet (Парыж, 1914), якія спадарыня Банькоўскі знайшла і набыла на швейцарскіх кніжных аўкцыёнах.
Моніка Банькоўскі – даўні сябар Нацыянальнай бібліятэкі Беларусі. З пачатку 90-х гадоў мінулага стагоддзя яна ўзначальвала аддзел славістыкі ў Цюрыхскай цэнтральнай навуковай і ўніверсітэцкай бібліятэцы. Пры яе дапамозе і актыўным удзеле было наладжана трывалае супрацоўніцтва з нашай бібліятэкай у галіне міжнароднага дакументаабмену. Супрацоўніцтва паспяхова працягвалася да яе сыходу на пенсію.
Аднак і пасля не спыніўся абмен выданнямі з Монікай Банькоўскі, ужо як з прыватнай асобай. З 2007 г. па сёння бібліятэка атрымала ад яе больш за 600 асобнікаў перыёдыкі і каля сотні беларускіх рэтраспектыўных дакументаў, якія з’яўляліся на швейцарскіх аўкцыёнах.
Да сённяшняга дня спадарыня Банькоўскі працягвае дасылаць нам перыядычныя выданні “Times Literary Supplement” і “Aus dem Antiquariat”. У сваю чаргу па яе замове бібліятэка адпраўляе некаторыя выданні, а таксама перыёдыку – “Здабыткі” і “Бібліятэчны свет”.
Свабодна валодаючы беларускай мовай, Моніка Банькоўскі неаднаразова брала ўдзел у міжнародных канферэнцыях, якія праводзяцца Нацыянальнай бібліятэкай Беларусі. Яе звязваюць прафесійныя кантакты з супрацоўнікамі НДА кнігазнаўства.
Шчыра дзякуем спадарыні Банькоўскі за каштоўны дар і спадзяёмся на далейшае супрацоўніцтва!
Матэрыял пададзены аддзелам камплектавання фондаў.
