25 мая адбыўся канцэрт з цыкла “Нацыянальная музычная спадчына Беларусі”, які завяршыў вясновы сезон інтэрактыўных музычных лекцый-канцэртаў у Нацыянальнай бібліятэцы і адначасова анансаваў праграму будучага сезона.
У выкананні розных складаў музычнай капэлы Цэнтра даследаванняў беларускай культуры, мовы і літаратуры НАН Беларусі прагучалі творы некалькіх эпох і жанраў. Так, харавы састаў прадставіў творы на музыку Л. Сімаковіч і В. Раінчыка. Струнны квартэт выклікаў захапленне гледачоў, сыграўшы творы К. Гігевіч, А. Казлоўскага, А. Літвіноўскага.
Сачыненні С. Манюшкі, М.К. Агінскага, Ю. Семянякі выканала жаночае вакальнае трыа ў суправаджэнні струннага квартэта, а таксама салісты капэлы – сапрана і барытон – у суправаджэнні фартэпіяна. Мультыінструменталіст Кацярына Радзівілава як заўсёды эмацыйна і пранікнёна выканала беларускія народныя песні, суправаджаючы спевы ігрой на аўтэнтычных інструментах (гуслі, дуда). Жаночы састаў хору прадставіў калядную сцэну “Каза” кампазітара Ларысы Сімаковіч для жаночага хору, скрыпкі і фартэпіяна.
Выступленне салістаў музычнай капэлы вельмі цёпла прынялі гледачы. Па завяршэнні канцэрта яны падыходзілі да артыстаў, знаёміліся, гутарылі, пранікнуўшыся цёплай і дамашняй атмасферай.
Запрашаем усіх жадаючых на наступны канцэрт “Гануся, сардэнька, маё ты каханне”, на якім будзе паказана, як сучасныя беларускія кампазітары на аснове розных прыёмаў рэцэпцыі даюць “новае жыццё” нацыянальнай харавой спадчыне. Плануецца прэзентацыя новага жанру сучаснай музыкі – музычнага ілюзіёну. У слухачоў будзе магчымасць развучыць старадаўнія ўзоры нацыянальнай музыкі і пачуць іх апрацоўку ў творах сучасных кампазітараў. Сустрэча адбудзецца 28.09.2023 у 18.30.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.
