29 мая ў бібліятэцы адбыўся канцэрт ірландскай традыцыйнай музыкі і танца ў выкананні гурта “Haunted House”, Алеся Чумакова і школы ірландскага танца “Celtic Dragon”.
У праграме прагучалі ірландскія мелодыі розных жанраў: аўтэнтычныя народныя песні “Oró sé” і “Cad é sin” на ірландскай мове; гістарычныя і эмігранцкія песні “Fields of Athenry” і “City of Chicago”, прысвечаныя эпосе Вялікага голаду ў Ірландыі (1845–1849) і хвалі ірландскай эміграцыі (другая палова XIX – пачатак ХХ стагоддзя); жартаўлівая песня аб прыгатаванні віскі “The Rare Old Mountain Dew” і вядомы хрысціянскі гімн XVIII стагоддзя “Amazing Grace”.
Школа “Celtic Dragon” прадставіла сольныя і групавыя танцавальныя нумары пад інструментальнае суправаджэнне музыкаў. Былі выкананы такія ірландскія традыцыйныя танцы, як джыгі, рылы, вальсы, полькі, флінгі і хорнпайпы.
Канцэрт атрымаўся вельмі душэўным. У праграму былі ўцягнуты гледачы, якія сумесна з танцорамі пасля невялікага майстар-класа ўзялі ўдзел у танцы кругавая джыга, а таксама ў вальсах.
Больш падрабязна з творчасцю “Haunted House” запрашаем азнаёміцца на YouTube-канале і ў сацыяльных сетках у групе “Ірландскія сейшаны ў Мінску”. Аб дзейнасці школы ірландскага танца можна даведацца на сайце “Celtic Dragon”, а таксама ў суполцы школы “ВКонтакте”.
Адкрывайце для сябе цудоўны свет ірландскай музыкі і танца!
Матэрыял пададзены аддзелам абслугоўвання спецыялізаванымі фондамі.
