18–19 кастрычніка ў Нацыянальнай бібліятэцы Беларусі прайшоў V Міжнародны кангрэс “Бібліятэка як феномен культуры”.
Арганізатарамі мерапрыемства сталі Міністэрства культуры Рэспублікі Беларусь, Нацыянальная бібліятэка Беларусі. У якасці партнёраў выступілі Нацыянальны цэнтр прававой інфармацыі Рэспублікі Беларусь, Пасольства Злучаных Штатаў Амерыкі ў Рэспубліцы Беларусь, Польскі інстытут у Мінску.
Удзел у працы кангрэса прынялі каля 500 дэлегатаў з Азербайджана, Беларусі, Польшчы, Расіі, ЗША і Украіны. Гэта вядучыя спецыялісты бібліятэк, музеяў, архіваў, выдавецтваў, адукацыйных, навукова-даследчых устаноў і арганізацый, прадстаўнікі заканадаўчай сферы і выканаўчай улады, вытворцы праграмнага забеспячэння, тэхнічных сродкаў, інфармацыйнай прадукцыі і прамысловага абсталявання для бібліятэк.
Галоўная тэма форуму ў гэтым годзе – “Камфортнае асяроддзе бібліятэк: новыя тэхналагічныя і матэрыяльна-тэхнічныя рашэнні”.
Двухдзённая праграма мерапрыемства была вельмі насычанай: у бібліятэцы прайшлі пленарнае і пяць секцыйных пасяджэнняў, круглы стол, два майстар-класы, мітап, публічная лекцыя, экскурсіі.
Важнай часткай кангрэса стала цырымонія ўзнагароджання пераможцаў ХХVI Рэспубліканскага конкурсу “Бібліятэка – асяродак нацыянальнай культуры”, лаўрэатаў Рэспубліканскага конкурсу на лепшы публічны цэнтр прававой інфармацыі, а таксама арганізатараў выставачных праектаў 2018 года – выстаўкі мастацкіх галаграм “Асвета. Пазнанне. Прагрэс” і міжнароднай выстаўкі “Беларусь і Біблія”, якая адкрылася 20 верасня.
Цырымонія ўзнагароджання і знаёмства з дзейнасцю бібліятэк па прававой асвеце насельніцтва былі працягнуты на пасяджэнні круглага стала “Арганізацыя дзейнасці публічных цэнтраў прававой інфармацыі: сучасныя падыходы і перспектывы”, на якім пераможцы конкурсу падзяліліся вопытам сваёй работы.
Стварэнне рэгіянальных зводных электронных каталогаў бібліятэк Беларусі – адна з актуальных задач, якія стаяць перад бібліятэкамі сёння. Пытанням яе паспяховага вырашэння было прысвечана два мерапрыемствы кангрэса: прэзентацыйная пляцоўка “Электронныя рэсурсы бібліятэк – удзельніц Рэгіянальных электронных каталогаў бібліятэк Беларусі ў нацыянальнай экасістэме ведаў” і мітап для спецыялістаў “Рэгіянальныя зводныя электронныя каталогі бібліятэк Беларусі”. Абодва мерапрыемства адбыліся 18 кастрычніка.
Абмеркаванне праблемы развіцця карпаратыўных рэсурсаў бібліятэк прадоўжылася ў той жа дзень на пасяджэнні Савета бібліятэк Беларусі па інфармацыйным узаемадзеянні. Кіраўнікі найбуйнейшых бібліятэк краіны выказалі прапановы па пытанні стварэння аб’яднанага рэпазіторыя інфармацыйных рэсурсаў адкрытага доступу ў Беларусі, змяненняў у фарміраванні карпаратыўных інфармацыйных рэсурсаў бібліятэк. Удзельнікі пасяджэння падвялі вынікі сёлетняй працы ЗЭК, РЗЭК і віртуальнай чытальнай залы Нацыянальнай бібліятэкі Беларусі, абазначылі перспектывы развіцця карпаратыўных рэсурсаў на 2019 г.
Падчас секцыйных пасяджэнняў 18 і 19 кастрычніка дэлегаты маштабнага форуму абмеркавалі праблемы будынкаў і абсталявання, арганізацыі бібліятэчнай прасторы, развіцця тэхналогій у комплекснай аўтаматызацыі бібліятэчных працэсаў, сучасных бібліятэчных сэрвісаў, прымянення электронных інфармацыйных рэсурсаў у дзейнасці бібліятэк і ключавыя аспекты іх стварэння, укаранення інфармацыйных тэхналогій у сферы апрацоўкі інфармацыі, кадравага забеспячэння бібліятэчнай дзейнасці.
У ходзе кангрэса ўдзельнікі атрымалі ўнікальную магчымасць прыняць удзел у двух майстар-класах. Так, 18 кастрычніка кіраўнік праекта Prabook.com Сяргей Дубавец прадэманстраваў асаблівасці пошуку персаналій у Інтэрнэце па ўскосных прыкметах. 19 кастрычніка Леанід Танін, старшыня Савета дырэктараў ЗАТ “Галаграфічная індустрыя”, падзяліўся сакрэтамі галаграфіі і яе выкарыстання ў напрамку духоўнага адраджэння нацыі.
19 кастрычніка асаблівую цікавасць ва ўдзельнікаў Кангрэса выклікала публічная лекцыя “Арыентаваныя на карыстальнікаў тэхналагічныя паслугі і дызайн” прафесійнага бібліятэкара, кіраўніка праектаў па будаўніцтве і рэканструкцыі бібліятэк, дырэктара і ўладальніка кампаніі 21st Century Libraries Consulting Чарльза Фораста (ЗША).
На працягу двух дзён працы rангрэса на выстаўцы “Бібліятэкі будучыні: тэхналогіі, будынкі, абсталяванне” ўдзельнікі маглі пазнаёміцца з найнавейшымі дасягненнямі ў сферы інфарматызацыі і тэхнічнага абсталявання бібліятэк, шырокім спектрам прадукцыі і паслуг кампаній, якія займаюцца прамысловай вытворчасцю і продажам стэлажнага, асвятляльнага і іншага абсталявання, праектаваннем і абслугоўваннем сістэм бяспекі і супрацьпажарнай абароны.