21–22 лістапада ў Нацыянальным полацкім гісторыка-культурным музеі-запаведніку адбылася V Міжнародная навуковая канферэнцыя “Сімяон Полацкі: светапогляд, грамадска-палітычная і літаратурная дзейнасць”.
Мерапрыемства было прымеркавана да 390-годдзя са дня нараджэння Сімяона Полацкага і 25-годдзя Музея-бібліятэкі Сімяона Полацкага. Упершыню канферэнцыя падобнай тэматыкі была праведзена ў Полацку ў 1999 годзе, і з тых часоў кожныя пяць год музей збірае даследчыкаў. Сёлета ўдзел у мерапрыемстве ўзялі даследчыкі і спецыялісты з Беларусі, Расіі і Латвіі.
На канферэнцыі прагучалі даклады і адбылося абмеркаванне па пытаннях, звязаных з асобай Сімяона Полацкага і яго эпохай, крос-культурнымі камунікацыямі ўсходнеславянскіх народаў у ХVII ст., канфесіянальнымі працэсамі на беларускіх землях у ХVI–ХVIII стст., гісторыяй Полацка, а таксама захаваннем, прэзентацыяй і інтэрпрэтацыяй помнікаў кніжнай культуры Беларусі ў музеях і бібліятэках.
Нацыянальную бібліятэку Беларусі прадставіла Таццяна Сапега, загадчык сектара навукова-праектнай дзейнасці навукова-даследчага аддзела кнігазнаўства, якая выступіла з дакладам “Кніжная культура для дзяцей: вопыт Нацыянальнай бібліятэкі Беларусі”.
У межах канферэнцыі была арганізавана выстаўка, на якой прэзентаваны арыгінальныя выданні Сімяона Полацкага, а таксама даследаванні яго спадчыны і выданні, што папулярызуюць асобу і дзейнасць асветніка. Экспанаты прадастаўлены з фондаў Нацыянальнага полацкага гісторыка-культурнага музея-запаведніка, Нацыянальнай бібліятэкі Беларусі, Цэнтральнай навуковай бібліятэкі імя Якуба Коласа Нацыянальнай акадэміі навук Беларусі.
Асабліва каштоўнымі з'яўляюцца, безумоўна, выданні ХVII ст. “Жезл правления” (1667), “Псалтирь в стихах” (1680), “Обед душевный” (1681), “Вечеря душевная” (1683) з фондаў ЦНБ імя Якуба Коласа НАН Беларусі.
Матэрыял падрыхтаваны навукова-даследчым аддзелам кнігазнаўства.
