З 8 па 9 кастрычніка ў Тбілісі (Грузія) прайшла Першая рэгіянальная канферэнцыя Культурнай праграмы Усходняга партнёрства.
У ёй узялі ўдзел прадстаўнікі краін – удзельніц праекта – Азербайджана, Арменіі, Беларусі, Грузіі, Малдовы, Украіны – і зацікаўленыя бакі з Еўрапейскага саюза.
Асноўнымі тэмамі канферэнцыі былі стратэгічная роля культуры ў сацыяльным, гуманітарным і эканамічным развіцці, а таксама шляхі і метады яе развіцця. Мэта праграмы – дапамога краінам – партнёрам ЕС у рэфармаванні і развіцці іх культурнай палітыкі, садзейнічанне дыялогу паміж дзяржаўнымі і прыватнымі суб’ектамі краін рэгіёна па пытаннях выпрацоўкі культурнай стратэгіі.
У ходзе канферэнцый былі прадстаўлены даклады асноўных удзельнікаў з шасці краін і некалькі канцэптуальных выступленняў пра стан і тэндэнцыі ў галіне культуры ў рэгіёне. Акрамя таго, адбылася прэзентацыя 15 праектаў, фінансіруемых у рамках Культурнай праграмы Усходняга партнёрства.
У складзе дэлегацыі ад Рэспублікі Беларусь удзел у канферэнцыі ўзяў намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Аляксандр Аляксандравіч Суша.
