Нацыянальная бібліятэка Беларусі ўзяла ўдзел у міжнароднай канферэнцыі “Тры дзесяцігоддзі партнёрства бібліятэк СНД: арыенціры і стратэгія развіцця” ў рамках мерапрыемстваў, якія праводзяцца з нагоды надання Душанбэ статусу “Культурная сталіца Садружнасці 2021 года” і прымеркаваных да 30-годдзя ўтварэння Садружнасці Незалежных Дзяржаў.
Канферэнцыя адбылася 29–30 верасня ў Нацыянальнай бібліятэцы Таджыкістана (г. Душанбэ). Арганізатарамі выступілі Выканаўчы орган дзяржаўнай улады г. Душанбэ, Нацыянальная бібліятэка Таджыкістана, Расійская дзяржаўная бібліятэка, Бібліятэчная асамблея Еўразіі пры падтрымцы Міждзяржаўнага фонду гуманітарнага супрацоўніцтва дзяржаў – удзельніц СНД.
У мерапрыемстве ўзялі ўдзел кіраўнікі і спецыялісты найбуйнейшых бібліятэк краін СНД з Азербайджана, Арменіі, Беларусі, Расіі, Таджыкістана і Узбекістана.
Мэта мерапрыемства – абагульніць дасягненні бібліятэк краін СНД у кантэксце 30-гадовага партнёрства і прапанаваць перспектыўныя стратэгіі супрацоўніцтва.
На пленарным пасяджэнні генеральны дырэктар Нацыянальнай бібліятэкі Беларусі А.Ю. Кніжнікава выступіла з дакладам “Бібліятэкі краін Садружнасці ў кантэксце прафесійнага ўзаемадзеяння: вопыт Нацыянальнай бібліятэкі Беларусі” і падзялілася вопытам супрацоўніцтва нашай бібліятэкі па пашырэнні інфармацыйна-культурных сувязей і ўзмацненні прафесійных камунікацый паміж бібліятэкамі СНД.
На пасяджэнні “Аб тым памеркаваўшы, што чакае наперадзе, мэту выбраўшы добрую, да яе прама ідзі (Абулькасім Фірдаўсі)” А.Ю. Кніжнікава і начальнік інфармацыйнага цэнтра Нацыянальнай бібліятэкі Беларусі А.А. Шарамецьева ўзялі ўдзел у дыскусіі па ключавых напрамках інфармацыйнага ўзаемадзеяння бібліятэк краін СНД у фарміраванні нацыянальных сегментаў электроннага кантэнту.