25–27 мая 2011 г. адбылася Міжнародная навукова-практычная канферэнцыя “Беларусь: гісторыя і сучаснасць”.
Арганізатарамі канферэнцыі выступілі: Міністэрства культуры Рэспублікі Беларусь, Беларускі дзяржаўны музей гісторыі Вялікай Айчыннай вайны, Акадэмія кіравання пры Прэзідэнце Рэспублікі Беларусь, Нацыянальная бібліятэка Беларусі, Расійскі цэнтр навукі і культуры ў г. Мінску.
У рабоце канферэнцыі ўзялі ўдзел звыш 150 вядомых беларускіх навукоўцаў – гісторыкі, сацыёлагі, палітолагі, а таксама юрысты, бібліятэчныя і музейныя спецыялісты з Расіі, Беларусі, Славакіі, Германіі, прадстаўнікі заканадаўчых і выканаўчых органаў, грамадскіх арганізацый, маладыя вучоныя.
Адкрыццё канферэнцыі, пленарнае пасяджэнне і круглы стол па пытаннях узаемадзеяння розных сацыяльных структур грамадства ў фарміраванні гістарычнай свядомасці і пераемнасці гістарычнай памяці адбыліся 25 мая ў Нацыянальнай бібліятэцы Беларусі, работа секцый прайшла 26–27 мая ў Беларускім дзяржаўным музеі гісторыі Вялікай Айчыннай вайны і Акадэміі кіравання пры Прэзідэнце Рэспублікі Беларусь.
Падчас адкрыцця канферэнцыі ўдзельнікаў віталі прадстаўнікі Савета Рэспублікі Нацыянальнага сходу Рэспублікі Беларусь, Міністэрства адукацыі, Міністэрства культуры, Нацыянальнай акадэміі навук Беларусі. Ад Нацыянальнай бібліятэкі Беларусі з вітальным словам звярнулася Кірухіна Людміла Генадзьеўна, намеснік дырэктара па навуковай рабоце і выдавецкай дзейнасці.
Дырэктар Цэнтральнага музея Узброеных Сіл (г. Масква, Расія) А.К. Ніканаў перадаў у дар Беларускаму дзяржаўнаму музею гісторыі Вялікай Айчыннай вайны копію Сцяга Перамогі, узнятага над Рэйхстагам у маі 1945 года.
На пленарным пасяджэнні былі заслуханы даклады пра заканадаўчыя асновы сацыяльнай палітыкі ў Рэспубліцы Беларусь (А.П. Морава, старшыня Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці), пра перспектывы развіцця Белдзяржмузея гісторыі Вялікай Айчыннай вайны (С.І. Азаронак, дырэктар музея), пра акцэнты гістарычнай памяці ў музейных экспазіцыях і выстаўках (В.М. Скрабін, намеснік дырэктара Цэнтральнага музея Вялікай Айчыннай вайны, Масква, Расія), пра дзяржаўную праграму алічбоўкі найбольш каштоўных музейных збораў і стварэнне электроннай нацыянальнай славацкай бібліятэкі (Мічаў Станіслаў, дырэктар Музея Славацкага нацыянальнага паўстання, г. Банска-Быстрыца, Славакія) і інш.
У рабоце круглага стала ўзялі ўдзел А.У. Іваноўскі, першы прарэктар Акадэміі кіравання пры Прэзідэнце Рэспублікі Беларусь; М.А. Бяспалая, загадчык кафедры гісторыі Беларусі і музеязнаўства Беларускага дзяржаўнага ўніверсітэта культуры і мастацтваў; Л.Г.Кірухіна, намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі; М.С. Шчокін, дырэктар Інстытута дзяржаўнай службы; А.К. Ніканаў, дырэктар Цэнтральнага музея Узброеных Сіл; Мічаў Станіслаў, дырэктар Музея Славацкага нацыянальнага паўстання; выкладчыкі і аспіранты шэрагу ВНУ; супрацоўнікі беларускіх і расійскіх музеяў і бібліятэк.
Падчас дыскусіі закраналіся праблемы захавання сістэмы патрыятычнага выхавання як інструменту фарміравання інтэлектуальных, духоўных і маральных асноў беларускага грамадства; аспекты ўзаемадзеяння і супрацоўніцтва ў гэтым напрамку ўстаноў культуры, адукацыі, навукі як Беларусі, так і краін блізкага замежжа: Расіяй, Украінай і інш; пытанні выкарыстання новых інфармацыйных тэхналогій у арганізацыі музейных экспазіцый. Падчас работы круглага стала станоўча была ацэнена работа навуковага калектыву Беларускага дзяржаўнага музея гісторыі Вялікай Айчыннай вайны па праектаванні экспазіцыі ў новым будынку і стварэнні канцэпцыі музея як сацыякультурнага цэнтра.
25–27 мая ў Нацыянальнай бібліятэцы Беларусі ў рамках работы канферэнцыі адбылася прэс-канферэнцыя сустаршыняў аргкамітэта і кіраўнікоў секцый з прадстаўнікамі беларускіх СМІ. Для ўдзельнікаў канферэнцыі была арганізавана экскурсія па бібліятэцы.
Супрацоўнікі Нацыянальнай бібліятэкі В.А. Рынкевіч, Т.А. Сапега выступілі з дакладамі на секцыі “Месца і роля музея і бібліятэкі ў сістэме захавання гістарычнай памяці і фарміраванні гістарычнай свядомасці”.
Па выніках работы канферэнцыі была прынята рэзалюцыя, у якой удзельнікі выказалі аднадушнае меркаванне аб карыснасці ўзаемадзеяння і канструктыўнага дыялогу гісторыкаў, музейных і бібліятэчных работнікаў, прадстаўнікоў дзяржаўных структур і грамадскіх арганізацый па фарміраванні гістарычнай свядомасці як асновы для кансалідацыі нашага грамадства.