19 снежня ў Нацыянальнай бібліятэцы Беларусі адбылося пасяджэнне круглага стала на тэму “Камплектаванне фондаў бібліятэк Беларусі ў кантэксце сучасных патрабаванняў грамадства”.
Мерапрыемства было арганізавана камітэтам па бібліятэчных фондах Беларускай бібліятэчнай асацыяцыі сумесна з аддзелам камплектавання фондаў Нацыянальнай бібліятэкі Беларусі.
У рабоце круглага стала прынялі ўдзел каля 50 чалавек. Сярод іх – кіраўнікі і спецыялісты аддзелаў камплектавання фондаў рэспубліканскіх, абласных бібліятэк, а таксама бібліятэк адукацыйных і іншых устаноў.
Пад час сустрэчы былі абмеркаваны асноўныя напрамкі фарміравання фондаў беларускіх бібліятэк розных сістэм і ведамстваў. Разгледжаны пытанні паступлення абавязковага бясплатнага экзэмпляра ў Нацыянальную бібліятэку Беларусі. У выступленнях былі раскрыты арганізацыйна-тэхналагічныя аспекты закупкі літаратуры для фондаў Нацыянальнай бібліятэкі Беларусі і рэспубліканскіх бібліятэк, асаблівасці правядзення закупачных працэдур па набыцці кніг, перыядычных выданняў і баз даных. Прадстаўнікі бібліятэк розных сістэм і ведамстваў абмяняліся вопытам рашэння праблем, якія ўзнікаюць пад час камплектавання бібліятэчных фондаў рознымі крыніцамі інфармацыі.
Мадэратарамі круглага стала выступілі Кузьмініч Т.В., намеснік дырэктара па інфармацыйных рэсурсах Нацыянальнай бібліятэкі Беларусі, і Жукоўская М.В., старшыня камітэта па бібліятэчных фондах ББА (Беларускай бібліятэчнай асацыяцыі), загадчык сектара ўнутрырэспубліканскага дакументаабмену і пераразмеркавання дакументаў аддзела камплектавання фондаў Нацыянальнай бібліятэкі Беларусі.
Ад Нацыянальнай бібліятэкі Беларусі з дакладамі выступілі Жукоўская М.В., Рынкевіч В.А., заг. сектара маніторынгу і каардынацыі дзейнасці бібліятэк навукова-даследчага аддзела бібліятэказнаўства; Мацкевіч А.П., заг. сектара прыёму дакументаў і кантролю за абавязковым экзэмплярам аддзела камплектавання фондаў; Ганчарэнка І.В., заг. сектара бягучага камплектавання нацыянальнымі дакументамі і дакументамі краін СНД аддзела камплектавання фондаў. Таксама былі заслуханы даклады Андрэевай І.С., заг. аддзела фарміравання рэсурсаў Рэспубліканскай навукова-медыцынскай бібліятэкі; Мізаўцовай Н.П., заг. аддзела фарміравання рэсурсаў Прэзідэнцкай бібліятэкі Рэспублікі Беларусь; Глінскай А.Г., заг. аддзела камплектавання бібліятэкі Беларускага дзяржаўнага эканамічнага ўніверсітэта; Анегдзінай М.В., заг. аддзела камплектавання і апрацоўкі Віцебскай абласной бібліятэкі імя У.І. Леніна; Волкавай І.В., заг. інфармацыйна-бібліятэчнага цэнтра ДУА “Сярэдняя школа № 3” г. Асіповічы.
 |
 |
 |
 |
