22 снежня ў Нацыянальнай бібліятэцы Беларусі ў рамках праекта “Кропка Адліку” ладзілася творчая гасцёўня – сустрэча з гуртом “Джамбібум”.
Гуртом выканаўцаў этнічнай музыкі “Джамбібум” кіруе Анастасія Хмель – выпускніца музычнага вучылішча і Белдзяржуніверсітэта культуры і мастацтваў, вакалістка і музыкант (гітара, флейта, перкусія – дарбукі, джамбеі, бубны і інш.).
Першае выступленне “Джамбібума” адбылося ў 2004 г. Этнагрупа спалучае ў сваёй творчасці традыцыйны беларускі вакал і цёплыя афрыканскія і паўднёваамерыканскія рытмы, выкарыстоўвае вялікую колькасць перкусійных і духавых інструментаў. Музыканты запісалі 2 альбомы “Джамбібум” і “Жавароначкі” (удастоены прыза замежных экспертаў у 2008 г.), выступалі на шматлікіх фестывалях.
Гасцям творчай гасцёўні быў прапанаваны шэраг мерапрыемстваў:
- паказ відэаканцэрта “Джамбібум” у Варшаве;
- выступленне этнагурта “Джамбібум”;
- прэзентацыя творчай лабараторыі (выступленне Рамана Абрамчука і групы “Саша & Віталь”);
- расповед пра калядныя традыцыі (выступленне Антаніны Хатэнкі – спецыяліста па этнаграфіі, аўтара кнігі “Зніч крыжовых дарог”, журналісткі);
- калядаванне.