20–21 лістапада ў Нацыянальнай бібліятэцы Беларусі праходзяць IV Міжнародныя кнігазнаўчыя чытанні “Новыя тэхналогіі ў захаванні дакументальнай спадчыны”.
На канферэнцыі будуць абмеркаваны пытанні сучаснага стану і перспектыў выкарыстання новых інфармацыйных тэхналогій у дзейнасці бібліятэк, музеяў і архіваў па захаванні дакументальнай спадчыны; разглядацца інавацыйныя падыходы ў абслугоўванні карыстальнікаў, заснаваныя на новых інфармацыйных тэхналогіях і сеткавым узаемадзеянні з іншымі бібліятэкамі і інфармацыйнымі цэнтрамі.
Арганізатарамі канферэнцыі выступілі Міністэрства культуры Рэспублікі Беларусь, Нацыянальная бібліятэка Беларусі, некамерцыйнае партнёрства “Бібліятэчная асамблея Еўразіі”, Інстытут імя Гётэ ў Мінску, Нясвіжскі раённы выканаўчы камітэт.
У рабоце канферэнцыі возьмуць удзел каля 400 дэлегатаў з 11 краін свету (Азербайджана, Вялікабрытаніі, Германіі, Ірана, Казахстана, Літвы, Малдовы, Польшчы, Расіі, Украіны, Чэхіі). Сярод удзельнікаў – прадстаўнікі міністэрстваў і ведамстваў, бібліятэчнай і навуковай грамадскасці, выкладчыкі і студэнты вядучых навучальных устаноў.
На пленарным і секцыйных пасяджэннях каля 50 удзельнікаў выступяць з дакладамі і паведамленнямі. Будуць абмеркаваны пытанні фарміравання і захавання дакументальнай спадчыны, захавання кніжных помнікаў у рэальнай і віртуальнай прасторы, стварэння лічбавых калекцый.
У рамках тэматычных напрамкаў канферэнцыі 21 лістапада адбудзецца выязное пасяджэнне секцыі “Нясвіж – культурны цэнтр Еўропы”, пад час якой замежным удзельнікам будзе прадстаўлена магчымасць азнаёміцца з адным з рэканструяваных і адрэстаўраваных аб’ектаў гісторыка-культурнай спадчыны Беларусі – палацава-паркавым ансамблем Нясвіжа. Правядзенне секцыі будзе спрыяць прыняццю сумесных рашэнняў па далейшым развіцці рэгіянальнага і міжнароднага супрацоўніцтва па захаванні дакументальнай і іншай культурнай спадчыны.
На прэзентацыйнай сесіі будзе прадстаўлена інфармацыйная прадукцыя такіх вядомых сусветных выдавецтваў, як Emerald Group Publishing (Вялікабрытанія), ЗАТ “КОНЭК” (Расія) і іншых, а таксама электронныя інфармацыйныя рэсурсы Інстытута імя Гётэ ў Мінску.
Пад час канферэнцыі будуць арганізаваны кніжныя і мастацкія выстаўкі, пройдзе шэраг прэзентацый і прафесійных сустрэч.
