19 студзеня ў галерэі “Ракурс” Нацыянальнай бібліятэкі Беларусі адбылося ўрачыстае адкрыццё IV Міжнароднага фестывалю пейзажа, прысвечанага Віталю Цвірку.
Віталь Цвірка – вядомы беларускі майстар пейзажа, народны мастак Беларусі, творчасць якога вылучаецца незвычайнай віртуознасцю, унікальным мастацкім бачаннем. Мастацкія творы В. Цвіркі сталі этапнымі для беларускага мастацтва, таму менавіта яго імем названы фестываль пейзажа, які праходзіць у Нацыянальнай бібліятэцы Беларусі ўжо ў чацвёрты раз.
У экспазіцыі свае работы прадставілі акварэлісты, жывапісцы, майстры фотамастацтва і графікі: У. Кожух, Я. Батальёнак, У. Ісачэнка, Ю Гаўрын, А. Забаўчык, В. Качан, В. Паўлавец, С. Каткова і інш.
Адкрыў фестываль куратар праекта, загадчык аддзела галерэйна-выставачнай дзейнасці Нацыянальнай бібліятэкі Беларусі, старшыня Міжнароднай гільдыі жывапісцаў Ф.А. Ястраб. На вернісажы таксама выступілі мастацтвазнавец і мастак, прафесар Р.Ф. Шаура,жывапісец В.К. Касцючэнка; дачка Віталя Цвіркі – Таццяна.
Музычныя кампазіцыі ўвазе гледачоў прадставіў узорны цымбальны аркестр “Абярог” пад кіраўніцтвам Алены Аўраменка Гімназіі-каледжа мастацтваў імя І.В. Ахрэмчыка.
Выстаўка ладзіцца да 11 лютага 2010 г. у галерэях “Ракурс” і “Лабірынт” Нацыянальнай бібліятэкі Беларусі.
 |
 |
 |
 |
 |
