19 кастрычніка ў Нацыянальнай бібліятэцы Беларусі адбыўся інфармацыйны семінар “Ініцыятывы OCLC для бібліятэк і інфармацыйных цэнтраў Беларусі”.
Семінар быў падрыхтаваны супрацоўнікамі Нацыянальнай бібліятэкі Беларусі (НББ, напрамак “Інфармацыйныя рэсурсы”) пры ўдзеле Камітэта па каталагізацыі Беларускай бібліятэчнай асацыяцыі.
У семінары бралі ўдзел больш за 180 прадстаўнікоў бібліятэк розных узроўняў і ведамстваў, выкладчыкі і студэнты Беларускага дзяржаўнага ўніверсітэта культуры і мастацтваў.
З дакладамі выступілі прадстаўнікі OCLC (Анлайнавага камп’ютарнага бібліятэчнага цэнтра):
- д-р Рэйн ван Чарлдорп, выканаўчы дырэктар OCLC EМЕА;
- сп. Вівіен Кук, спецыяліст WorldCat, рэгіянальны менеджар;
- сп. Эрык ван Любек, дырэктар па продажах OCLC EМЕА.
Былі асветленыя асноўныя кірункі дзейнасці OCLC, прадстаўлены глабальны анлайнавы бібліяграфічны рэсурс WorldCat, а таксама самыя новыя інфармацыйныя тэхналогіі гэтага цэнтра.
Семінар дазволіў бібліятэчнай грамадскасці краіны пазнаёміцца з дзейнасцю цэнтра, у тым ліку ва Усходняй і Заходняй Еўропе, а таксама з перавагамі, якія атрымаюць беларускія бібліятэкі ад супрацоўніцтва з OCLC.
Пасля семінара прадстаўнікі OCLC наведалі аддзелы камплектавання фондаў, бібліяграфічнай апрацоўкі дакументаў, вядзення нацыянальнай базы даных аўтарытэтных запісаў, аддзел кнігазахоўвання НББ і азнаёміліся з тэхналогіяй каталагізацыі розных відаў дакументаў, бібліяграфічнымі запісамі, створанымі ў НББ, і сфарміраванымі на іх аснове электроннымі інфармацыйнымі рэсурсамі, асаблівасцямі ўліку і захоўвання дакументаў у НББ.