28 і 29 мая віртуальная чытальная зала Нацыянальнай бібліятэкі Беларусі сумесна з міжнародным выдавецтвам Wiley прадставілі беларускім вучоным электронныя інфармацыйныя рэсурсы для навуковай дзейнасці.
Семінары-прэзентацыі прайшлі ў Акадэміі кіравання пры Прэзідэнце Рэспублікі Беларусь і Рэспубліканскім навукова-практычным цэнтры эпідэміялогіі і мікрабіялогіі.
Беларускім бібліятэкам і арганізацыям – партнёрам па віртуальнай чытальнай зале сёння даступны шырокі спектр вядучых сусветных навуковых баз даных, у якіх прадстаўлена інфармацыя па розных галінах ведаў. Спецыялісты Нацыянальнай бібліятэкі Беларусі Марыя Дамоўская, Вячаслаў Брычкоўскі і Артур Марудзін пазнаёмілі ўдзельнікаў семінараў з іх зместам і магчымасцямі выкарыстання ў айчынных навуковых даследаваннях. Вялікую цікавасць у слухачоў выклікала інфармацыя аб ініцыятыве адкрытага доступу пры арганізацыі інфармацыйнага забеспячэння інавацыйнай дзейнасці.
Асаблівасці пошуку навуковай інфармацыі на электроннай платформе Wiley для ўдзельнікаў семінараў прэзентавала Наталля Каліцава, прадстаўнік выдавецтва ў СНД.
Доступ да інфармацыйных рэсурсаў Wiley адкрыты для ўсіх карыстальнікаў Нацыянальнай бібліятэкі.
Матэрыял прадастаўлены аддзелам карпаратыўнага ўзаемадзеяння.
