Мерапрыемства было арганізавана Нацыянальнай бібліятэкай Беларусі, Беларускім рэспубліканскім навукова-медыцынскім грамадствам траўматолагаў-артапедаў і РНПЦ траўматалогіі і артапедыі.
Семінар адкрылі дырэктар бібліятэкі Раман Матульскі і дырэктар РНПЦ траўматалогіі і артапедыі Міхаіл Герасіменка.
Удзельнікам быў прадстаўлены шырокі спектр сусветных электронных інфармацыйных рэсурсаў у сферы медыцыны. Пра магчымасці іх выкарыстання праз віртуальную чытальную залу НББ медыкам распавяла загадчыца аддзела карпаратыўнага ўзаемадзеяння Марына Рудакоўская.
Прынцыпы фарміравання інфармацыйных рэсурсаў адкрытага доступу і крыніцы адкрытай навуковай інфармацыі па траўматалогіі і артапедыі прадставіў загадчык сектара аддзела карпаратыўнага ўзаемадзеяння Вячаслаў Брычкоўскі.
Вялікую цікавасць у слухачоў выклікалі выступленні загадчыка лабараторыі траўматалогіі дарослага ўзросту РНПЦ траўматалогіі і артапедыі Аляксандра Сітніка аб найноўшых тэхналагічных дасягненнях і прымяненні метадаў дапоўненай рэальнасці ў траўматалогіі, а таксама аб міжнародным вопыце навукова-медыцынскіх даследаванняў.
У семінары прынялі ўдзел 55 слухачоў – прадстаўнікі РНПЦ траўматалогіі і артапедыі, Мінскага гарадскога клінічнага цэнтра траўматалогіі і артапедыі, гарадскіх клінічных бальніц, паліклінік, Беларускага дзяржаўнага медыцынскага ўніверсітэта, Беларускай медыцынскай акадэміі паслядыпломнай адукацыі, рэдакцыі газеты “Медыцынскі веснік”.
Матэрыял падрыхтаваны аддзелам карпаратыўнага ўзаемадзеяння.