18 снежня адбылося арганізаванае сумесна Міністэрствам замежных спраў Рэспублікі Беларусь і Нацыянальным гістарычным музеем Рэспублікі Беларусь святочнае мерапрыемства, прысвечанае 200-годдзю з дня нараджэння выдатнага кампазітара Станіслава Манюшкі.
У мерапрыемстве прынялі ўдзел члены Нацыянальнай камісіі па справах ЮНЕСКА, партнёры камісіі, дыпламаты пасольства Польшчы ў Беларусі, кіраўніцтва Польскага інстытута ў Мінску, прадстаўнікі сфер культуры і адукацыі нашай краіны.
З прывітальнымі словамі да ўдзельнікаў звярнуліся міністр замежных спраў Рэспублікі Беларусь, старшыня Нацыянальнай камісіі па справах ЮНЕСКА Уладзімір Макей, першы намеснік міністра культуры Наталля Карчэўская, часовы павераны ў справах Рэспублікі Польшча ў Рэспубліцы Беларусь Марцін Вайцяхоўскі, дырэктар Нацыянальнага гістарычнага музея Рэспублікі Беларусь Павел Сапоцька і намеснік дырэктара Нацыянальнай бібліятэкі Беларусі Аляксандр Суша.
Пасля ўрачыстай часткі мерапрыемства госці змаглі больш падрабязна пазнаёміцца з віртуальным праектам Нацыянальнай бібліятэкі Беларусі “Станіслаў Манюшка. Музычны рамантык з Міншчыны”, а таксама ўзяць на памяць сувенірную прадукцыю з выявай кампазітара.
Таксама госці азнаёміліся з выстаўкай “Станіслаў Манюшка. Падарожжа ў ХІХ стагоддзе”, падрыхтаванай філіялам Нацыянальнага гістарычнага музея Рэспублікі Беларусь “Музей гісторыі тэатральнай і музычнай культуры”.
Прыемным падарункам для прысутных стала выкананне твораў С. Манюшкі студэнтамі Беларускай дзяржаўнай акадэміі музыкі, а таксама тэматычныя лінагравюры, падрыхтаваныя ў якасці памятных сувеніраў навучэнцамі Мінскага дзяржаўнага мастацкага каледжа імя А.К. Глебава.
Матэрыял прадастаўлены інфармацыйна-аналітычным аддзелам.