22 лістапада ў бібліятэцы ладзіцца адкрыццё выстаўкі “Светлы след”, прымеркаванай да 125-годдзя з дня нараджэння Максіма Багдановіча.
Напярэдадні знакавай даты Нацыянальная бібліятэка Беларусі і Нацыянальны архіў Рэспублікі Беларусь прадставяць кніжныя зборы і архіўныя дакументы па ўшанаванні памяці класіка беларускай літаратуры.
Экспазіцыя будзе складацца з дзвюх частак. Першая прадэманструе выданні 1907−1917 гг., экзэмпляры з аўтографамі паэта і архіўныя матэрыялы. Сярод іх – адзіны прыжыццёвы зборнік “Вянок” з аўтарскім дароўным надпісам, асобныя выданні яго твораў, пратаколы пасяджэнняў, указы і пастановы аб прысваенні імя Максіма Багдановіча вуліцам, школам, бібліятэкам краіны і інш.
Другая частка выстаўкі – літаратурная экспазіцыя “І зорка гарыць, і не вяне вянок...”, на якой будуць прадстаўлены каля 200 выданняў. Гэта кнігі з творамі Багдановіча і літаратура пра жыццё беларускага песняра.
Побач з сучаснымі выданнямі на выстаўцы размесцяцца факсіміле зборніка “Вянок”, больш за 30 кніг з выбранымі творамі паэта і Поўны збор твораў у 3-х тамах. Таксама тут можна будзе ўбачыць пераклады яго паэзіі на славянскія і еўрапейскія мовы, асобныя выданні і артыкулы вядомых даследчыкаў творчасці М. Багдановіча, такіх як А. Лойка, Л. Зубараў, С. Майхровіч, А. Бачыла, Н. Ватацы і інш.
Запрашаем на выстаўку ўсіх, хто неабыякавы да нацыянальнай духоўнай спадчыны, жыцця і творчасці класіка беларускай літаратуры Максіма Багдановіча.
Адкрыццё выстаўкі адбудзецца а 16-й гадзіне ў галерэі “Лабірынт” (3-ці паверх).
Выстаўка працуе:
22 лістапада – у музеі кнігі,
з 23 лістапада – у кальцавым калідоры 2-га паверха.
Тэлефоны для даведак: (8 017) 293 27 56, 293 27 22.
Е-mail: pr@nlb.by
