Віртуальная чытальная зала Нацыянальнай бібліятэкі Беларусі працягвае знаёміць з краязнаўчымі рэсурсамі арганізацый-партнёраў. Сёння мы прадстаўляем літаратурны музей “Два таленты – два лёсы” дзяржаўнай установы культуры “Светлагорская раённая сетка бібліятэк” Гомельскай вобласці.
Па спасылцы з віртуальнай чытальнай залы вы трапіце на старонку музея і пазнаёміцеся з творчасцю Ізяслава Рыгоравіча Катлярова і Соф’і Мікалаеўны Шах – светлагорцаў, сучасных майстроў мастацкага слова. Ім лёс падарыў дзіўны шанец – быць не толькі сямейнай парай, але і паспяховымі партнёрамі ў паэтычнай творчасці. Іх аб’ядноўвае і любоў да жывапісу: С.М. Шах адкрыла ў сабе дар мастака, І.Р. Катляроў выпесціў гарадскую карцінную галерэю “Традыцыя” імя Г. Пранішнікава.
На старонках мясцовых газет або масцітых часопісаў, у зборніках цэнтральных выдавецтваў, на сустрэчах з чытачамі – уся дзейнасць гэтых двух таленавітых людзей, накіраваная на ўслаўленне сваёй малой радзімы, фарміраванне культурнай прасторы аднаго з самых маладых гарадоў нашай краіны, горада нафтавікоў, хімікаў і энергетыкаў, горада з маляўнічым наваколлем і творчымі землякамі.
У планах віртуальнай чытальнай залы – іншыя цікавыя інтэрнэт-падарожжы па рэсурсах, якія распавядаюць пра малыя куткі Беларусі, пра людзей, улюбёных у родны край. Так родная прастора стане віртуальна бліжэй нават тым карыстальнікам, якія знаходзяцца ў самых аддаленых краінах свету.