18 мая ў Нацыянальнай бібліятэцы Беларусі ў рамках Дзён культуры Швецыі ў Беларусі (13 мая – 12 чэрвеня) ладзілася літаратурна-творчая сустрэча “Гукі і ўспаміны дзяцінства”.
Падчас сустрэчы адбылася прэзентацыя кнігі шведскіх дзіцячых пісьменнікаў Юі і Томаса Вісландэраў “Малы і мядзведзік”. Гэтае мерапрыемства з’яўляецца сумесным праектам РВУ “Літаратура і мастацтва”, Пасольства Каралеўства Швецыя ў Рэспубліцы Беларусь і Нацыянальнай бібліятэкі Беларусі.
Кніга шведскіх аўтараў была выдадзена на беларускай мове ў РВУ “Літаратура і мастацтва” пры падтрымцы Пасольства Каралеўства Швецыя ў Рэспубліцы Беларусь у 2010 г. Пераклад са шведскай мовы падрыхтаваны Надзеяй Кандрусевіч.
На прэзентацыі выступілі Надзвычайны і Паўнамоцны Пасол Каралеўства Швецыя ў Рэспубліцы Беларусь Стэфан Эрыксан, в.а. дырэктара Нацыянальнай бібліятэкі Беларусі Людміла Кірухіна і дырэктар РВУ “Літаратура і мастацтва” Аляксандр Карлюкевіч. Аўтар кнігі “Малы і мядзведзік” Юя Вісландэр расказала пра сваю творчасць, адказала на пытанні прысутных і правяла ў рамках сустрэчы аўтограф-сесію.
У ролі вядучай вечара выступіла пісьменніца, галоўны рэдактар часопіса “Бярозка” Алена Масла. Сваёй творчасцю гасцей мерапрыемства парадаваў узорны дзіцячы тэатр “Сіняя птушка” Мінскага дзяржаўнага палаца дзяцей і моладзі. Музычнае суправаджэнне вечара ў выкананні музыканта-мультыінструменталіста Яраша Малішэўскага стварыла атмасферу казкі і дазволіла акунуцца ў свет гукаў і ўспамінаў дзяцінства.