Да 600-годдзя славутай перамогі на Грунвальдскім полі Нацыянальная бібліятэка Беларусі падрыхтавала камплект паштовак "Грунвальдская бітва ў выявах: па матэрыялах з фондаў Нацыянальнай бібліятэкі Беларусі".
Грунвальдская бітва аб’яднаных войск Польскага каралеўства і Вялікага княства Літоўскага над рыцарамі Тэўтонскага ордэна 15 ліпеня 1410 г. стала адной з эпахальных падзей айчыннай і еўрапейскай сярэднявечнай гісторыі, якая прадвызначыла лёс многіх краін і народаў. Супраць рыцараў-крыжакоў Тэўтонскага ордэна мужна змагаліся ваяры з тэрыторый сучасных Беларусі, Польшчы, Літвы, Латвіі, Украіны, Расіі, Чэхіі, ваяры пад татарскімі харугвамі. Бітва пад Грунвальдам знайшла адлюстраванне амаль ва ўсіх еўрапейскіх хроніках ХV–XVI стст. і ў далейшым стала аб’ектам пільнай увагі гісторыкаў і літаратараў розных краін. У выяўленчым мастацтве тэмы і сюжэты, прысвечаныя бітве пад Грунвальдам, былі і застаюцца актуальнымі сярод творцаў.
Выяўленчы матэрыял на паштоўках дазваляе зірнуць на падзеі далёкай мінуўшчыны вачыма вядомых і невядомых мастакоў. У камплект з 16 паштовак уключаны гравюры з хронік, рэпрадукцыі самых знакамітых напісаных у батальным жанры палотнаў ХІХ – пачатку ХХ ст. польскіх мастакоў Я. Матэйкі, Ю. і В. Косакаў, чэшскага мастака А. Мухі. Партрэтная галерэя прадстаўлена выявамі трох галоўных гістарычных асоб – вялікага князя літоўскага Вітаўта, караля Польшчы Ягайлы і вялікага магістра Тэўтонскага ордэна Ульрыха фон Юнгінгена. Уключаны таксама некалькі цікавых ілюстрацый з літаратурных і гістарычных твораў.
Выданне разлічана на шырокае кола карыстальнікаў, якія цікавяцца беларускай і сусветнай гісторыяй і культурай.
Камплект паштовак можна набыць па падпісцы або купіць у кіёску Нацыянальнай бібліятэкі Беларусі, размешчаным на 1-м паверсе каля галоўнага ўвахода. Цана камплекта – 10 120 бел. руб.
8 ліпеня ў галерэі “Лабірынт” Нацыянальнай бібліятэкі Беларусі адбылося адкрыццё гісторыка-культурнага праекта “Грунвальд-600”, у рамках якога прайшла прэзентацыя кнігі Юрыя Бохана “Ваяры Грунвальдскай бітвы” і камплекта паштовак “Грунвальдская бітва ў выявах: па матэрыялах з фондаў Нацыянальнай бібліятэкі Беларусі”.