3 мая ў бібліятэцы прайшла прэзентацыя кнігі “Францыск Скарына. Са слаўнага горада Полацка”.
Цікавасць да асобы Францыска Скарыны з далёкіх часоў праяўлялі расійскія, польскія, чэшскія, нямецкія і іншыя даследчыкі. У Беларусі дасканалае вывучэнне яго жыцця і дзейнасці пачалося ў пачатку XX стагоддзя. Першая вядомая на беларускай мове публікацыя пра славутага асветніка, падрыхтаваная Сяргеем Палуянам, з’явілася на старонках “Нашай нівы”. Імя першадрукара згадваецца таксама і ў літаратурным зборніку “Калядная пісанка, 1913 год”. Шматлікія артыкулы, навукова-папулярныя і вучэбныя выданні, творы мастацкай літаратуры былі створаны і прымеркаваны да значных падзей, такіх як 400-гадовы юбілей беларускага кнігадрукавання, 500-годдзе з дня нараджэння Францыска Скарыны і іншых.
З нагоды сёлетняга святкавання 500-годдзя беларускага кнігадрукавання свет пабачыла новае грунтоўнае выданне “Францыск Скарына. Са слаўнага горада Полацка”, якое аб’яднала пад адзінай вокладкай публікацыі беларускіх аўтараў, у большасці навукова-папулярныя нарысы.
Як адзначыў падчас мерапрыемства Аляксандр Суша, укладальнік кнігі, намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці, “беларусы стварылі сабе Скарыну”. Звяртаючыся да вобраза асветніка ў пачатку XX стагоддзя, грамадскасць шукала гісторыю свайго народа, яе карані. Таму можна лічыць, што кніга расказвае, як беларусы канструявалі сваё нацыянальнае самавызначэнне праз вобраз Скарыны.
Галоўны рэдактар выдавецтва “Мастацкая літаратура” Віктар Шніп выказаў словы падзякі бібліятэцы і асабіста Аляксандру Сушы за сумесную працу, у выніку якой і з’явілася такое грунтоўнае выданне пра Скарыну. Дарэчы, кніга стала лаўрэатам Нацыянальнага конкурсу “Мастацтва кнігі” ў бягучым годзе. І гэта невыпадкова, бо працаваў над яе афармленнем Усевалад Свентахоўскі – адзін з лепшых сучасных мастакоў кнігі, дацэнт кафедры тэорыі і гісторыі дызайну Беларускай дзяржаўнай акадэміі мастацтваў.
У мерапрыемстве таксама прынялі удзел Дзмітрый Пятровіч, рэдактар выдання, Анатоль Бутэвіч, намеснік старшыні Беларускага фонду культуры, і Адам Мальдзіс, ганаровы старшыня Міжнароднай асацыяцыі беларусістаў.
Напрыканцы сустрэчы адбыўся прагляд роліка-апытання пра Францыска Скарыну, падрыхтаванага Глебам Куфцерыным. Анімацыя стала яшчэ адным сведчаннем таго, што беларусы сёння думаюць пра Скарыну і ўсведамляюць значнасць і велічнасць яго справы.