У бібліятэцы адбыліся творчыя заняткі для дзяцей, прысвечаныя гравюры. Удзельнікі наглядна пазнаёміліся з гэтым відам мастацтва на выстаўках “Узноўлены шэдэўр” і “ILLUSTRATIO. Разнастайнасць тэхнік ілюстравання”.
На занятках у музеі кнігі дзеці даведаліся, што стварэнне гравюры патрабуе больш, чым выяўленчы талент мастака. Акрамя прадуманай ідэі, выверанай кампазіцыі пры выкананні малюнка, неабходны прыкладныя уменні ў стварэнні гравіравальных форм, веданне тэхналогій і навыкі работы з друкарскім станком.
Юныя наведвальнікі мелі магчымасць убачыць старадрукі з гравюрамі, сучасныя ілюстраваныя выданні, гравіравальную дошку XVII стагоддзя, штыхелі, разцы, афортны станок і г.д. Дзякуючы экспанатам выставак дзеці пераканаліся, што работа мастака-гравёра паэтапная і патрабуе высокага майстэрства. Спачатку мастак малюе на цвёрдай паверхні, потым спецыяльнымі прыборамі высякае кожную лінію. Малюнак на дошцы ствараць няпроста, так як ён люстрана адбівае эстамп. Калі аснова гатова, на аб’ёмны малюнак наносіцца спецыяльная фарба і выява ў выглядзе адбітка пераносіцца на паверхню. Адбітак гравюры робіцца з дапамогай друкаванай формы, якая называецца дошкай. Дошка можа быць як з дрэва, так і з іншых матэрыялаў, напрыклад, металу ці лінолеуму.
Першыя ў беларускім кнігадрукаванні гравюры былі размешчаны яшчэ ў выданнях Францыска Скарыны: больш за 50 гравюр на дрэве, больш за 500 заставак і 900 ініцыялаў.
Удзельнікі заняткаў паспрабавалі зрабіць адбіткі з драўляных дошак з выявай скарынавага знака “Сонца і Месяц” і ініцыялаў і заставак з яго кніг.
Матэрыял пададзены навукова-даследчым аддзелам кнігазнаўства.
