27–29 ліпеня ў г. Сергіеў Пасад на базе Маскоўскай духоўнай акадэміі адбыўся XXVII Міжнародны адукацыйны форум “Глінскія чытанні”. Тэма форуму – “Духоўныя і маральныя асновы адукацыі і выхавання”.
Мерапрыемства было прымеркавана да дня памяці схіархімандрыта Іаана (Маслава) (1932–1991) – вучонага-багаслова, адметнага педагога, дацэнта Маскоўскай духоўнай акадэміі, нашага сучасніка. Жыццё і духоўнае служэнне айца Іаана звязаны з Беларуссю: з 1985 па 1991 год ён служыў у Свята-Успенскім Жыровіцкім мужчынскім манастыры духоўнікам.
Глінскія чытанні прайшлі пры ўдзеле Міністэрства навукі і вышэйшай адукацыі Расійскай Федэрацыі, Міністэрства культуры Расійскай Федэрацыі, Міністэрства абароны Расійскай Федэрацыі, Міністэрства аховы здароўя Расійскай Федэрацыі. У якасці арганізатара выступіла Маскоўская педагагічная акадэмія.
У мерапрыемстве прынялі ўдзел больш за 500 чалавек з Расіі, Беларусі, Латвіі, Украіны, Эстоніі. Сярод удзельнікаў з нашай краіны – бібліятэчныя спецыялісты, педагогі, святары з Мінска, Полацка, Пінска, Маладзечна і іншых рэгіёнаў.
27 ліпеня, у першы дзень форуму, адбыліся пасяджэнні секцый і круглых сталоў, прысвечаныя духоўна-маральнаму выхаванню ў сям'і, дашкольных установах, установах агульнай сярэдняй і прафесійнай адукацыі, асветніцкай ролі бібліятэк.
28 і 29 ліпеня прайшлі пленарныя пасяджэнні.
Нацыянальную бібліятэку Беларусі на форуме прадставіла галоўны бібліятэкар навукова-даследчага аддзела бібліятэказнаўства Вольга Аляксандраўна Рынкевіч, якая выступіла ў якасці мадэратара секцыі “Бібліятэкі ў духоўна-маральным выхаванні дзяцей і моладзі”. У пасяджэнні прынялі ўдзел спецыялісты публічных, школьных, прыхадскіх бібліятэк з Расіі і Беларусі. Падчас работы секцыі абмяркоўваліся пытанні супрацоўніцтва свецкіх і царкоўных бібліятэк па пытаннях духоўна-маральнага асветы і выхавання, павышэння кваліфікацыі бібліятэчных спецыялістаў, якія працуюць з праваслаўнай літаратурай.
28 ліпеня Вольга Аляксандраўна выступіла на пленарным пасяджэнні форуму з дакладам “Асветніцкая работа бібліятэк па фарміраванні праваслаўнага светапогляду па працах схіархімандрыта Іаана (Маслава) (на прыкладзе бібліятэк Беларусі)”. У сваім выступленні яна расказала пра дзейнасць Нацыянальнай бібліятэкі Беларусі, яе ролю ў справе захавання нацыянальнай духоўнай спадчыны, прааналізавала вынікі ўзаемадзеяння публічных, школьных і прыхадскіх бібліятэк у рамках праграм супрацоўніцтва Міністэрства культуры Рэспублікі Беларусь, Міністэрства адукацыі Рэспублікі Беларусь і Беларускай праваслаўнай царквы, распавяла аб выкарыстанні прац айца Іаана ў асветніцкай дзейнасці бібліятэк Беларусі. Даклад выклікаў вялікую цікавасць сярод удзельнікаў мерапрыемства.
У ходзе работы міжнароднага адукацыйнага форуму “Глінскія чытанні” ўдзельнікам была прадстаўлена магчымасць пазнаёміцца з сістэмай работы бібліятэк па духоўна-маральнай асвеце і выхаванні падрастаючага пакалення, абмяняцца вопытам.