10 студзеня ў бібліятэцы прайшла прэзентацыя электроннага выдання “Станаўленне беларускай дзяржаўнасці: па старонках беларускіх газет 1917–1922 гг.”.
Унікальны праект – сапраўдная знаходка для ўсіх, хто цікавіцца айчыннай гісторыяй. На 2 кампакт-дысках сабраны копіі каля 2 400 нумароў газет з фондаў Нацыянальнай бібліятэкі Беларусі, Нацыянальнага архіва Рэспублікі Беларусь і іншых арганізацый, а таксама артыкул кандыдата гістарычных навук Андрэя Унучака “Беларускі друк у перыяд станаўлення нацыянальнай дзяржаўнасці. 1917–1922 гг.”
Прэзентацыя пачалася з выступлення дырэктара Нацыянальнай бібліятэкі Беларусі Рамана Матульскага. Ён адзначыў, што многія гістарычныя падзеі адбіваюцца на старонках газет – у люстэрку публіцыстыкі, таму новае электроннае выданне – выдатная магчымасць для даследчыкаў пазнаёміцца з папяровымі сведкамі станаўлення беларускай дзяржаўнасці.
У мерапрыемстве прынялі ўдзел дырэктар Нацыянальнага архіва Рэспублікі Беларусь Андрэй Дземянюк, старшыня Пастаяннай камісіі па адукацыі, культуры і навуцы Палаты прадстаўнікоў Нацыянальнага сходу Рэспублікі Беларусь Ігар Марзалюк, загадчык аддзела гісторыі Беларусі Новага часу ДНУ “Інстытут гісторыі Нацыянальнай акадэміі навук Беларусі” Андрэй Унучак і загадчыца сектара інфармацыйна-аналітычнага аддзела, укладальнік электроннага выдання Вольга Грынкевіч.
Пасля прэзентацыі госці ў музеі кнігі пазнаёміліся з экспазіцыяй выстаўкі “«Маніхвэст» Рэспублікі”, прымеркаванай да 100-годдзя абвяшчэння БССР.
Матэрыял прадастаўлены аддзелам сувязей з грамадскасцю.
Чытайце таксама пра тое, як прайшла прэзентацыя электроннага выдання “Станаўленне беларускай дзяржаўнасці: па старонках беларускіх газет 1917–1922 гг.” у інтэрнет-рэсурсе "СБ. Беларусь сегодня".
