Штогод 21 лютага сусветная грамадскасць адзначае Міжнародны дзень роднай мовы. Нацыянальная бібліятэка – адна з тых устаноў, якія закліканы захоўваць беларускую культурную спадчыну.
Традыцыйна галоўны сацыякультурны і інфармацыйны цэнтр краіны праводзіць тэматычныя мерапрыемствы і акцыі, прысвечаныя роднай мове.
У гэты дзень на вонкавым электронным светлавым табло для мінчан і гасцей сталіцы дэманструюцца цытаты класікаў і спрадвечныя беларускія словы, такія, напрыклад, як “багоўка”, “усцяж” і “крынічыць”. Для тых жа, хто вырашыць праверыць свае здагадкі, значэнні слоў будуць размешчаны ў афіцыйных групах бібліятэкі ў сацыяльных сетках. Дэвіз акцыі – “Слоў не крышыць ні век, ні тапор” – цытата беларускага класіка Якуба Коласа.
У Дзень роднай мовы ў бібліятэку прыехала яго ўнучка Марыя Міцкевіч. Яна прывезла ўнікальны рукапіс перакладу Евангелля малодшага брата Якуба Коласа – Міхася Міцкевіча. Толькі адзін дзень рарытэт можна ўбачыць у музеі кнігі.
А вось выстаўку “Родная мова – душа народа” ў зале дакументаў міжнародных арганізацый (пам. 207g) можна наведаць да 17 сакавіка. Прадстаўленыя матэрыялы адлюстроўваюць вялізныя намаганні ўрадаў, устаноў Арганізацыі Аб'яднаных Нацый, арганізацый грамадзянскай супольнасці, накіраваныя на захаванне, павагу, заахвочванне і абарону моў.
Для навучэнцаў гімназіі № 14, сярэдняй школы імя Якуба Коласа № 44 і сярэдняй школы № 140 прайшлі экскурсіі з цыклу “Славутыя імёны Бацькаўшчыны” па творчасці Францыска Скарыны і Якуба Коласа.
З Міжнародным днём роднай мовы!
Няхай песні на роднай мове гучаць званчэй, а добрыя словы па-беларуску натхняюць вас на развіццё, самапазнанне, дапамагаюць ствараць карысныя і цікавыя рэчы.
Чытайце і глядзіце пра нас у матэрыялах СМІ: