26 студзеня ў бібліятэцы адбылася публічная лекцыя “Крыніцы гістарычнай памяці”, прысвечаная Году гістарычнай памяці.
Госцем і экспертам выступіў знакаміты гісторык беларускіх летапісных крыніц, кандыдат філалагічных навук Вячаслаў Чамярыцкі з тэмай “Беларускія летапісы і хронікі”.
Гартаючы старонкі беларускай гісторыі, удзельнікі даведаліся шмат цікавага пра беларускія паданні і дзелавое пісьменства, літаратурныя традыцыі летапісання і гістарычную прозу Старажытнай Русі і звярнулі ўвагу на каштоўныя помнікі: “Аповесць мінулых гадоў”, “Галіцка-Валынскі летапіс”, “Навагрудскі летапіс”, “Хроніку Быхаўца”, “Летапіс князёў літоўскіх”.
Усе гэтыя дакументы – жывыя сведкі багатай мінуўшчыны беларускага народа, каштоўны здабытак яго важнай культурнай спадчыны, неацэнная крыніца пазнання шматвяковай гісторыі, напоўненай гераічнай барацьбой за незалежнасць і мірнай стваральнай працай, падзеямі вялікай гістарычнай важнасці. Яны служылі і служаць невычэрпнай крыніцай тэм, вобразаў і сюжэтаў, ведаў і натхнення для вучоных, мастакоў і пісьменнікаў.
Наступная сустрэча адбудзецца 2 лютага а 15-й гадзіне ў зале адукацыйных тэхналогій (пам. 346). Іна Калечыц, дацэнт кафедры дапаможных гістарычных дысцыплін і методыкі выкладання гісторыі БДПУ імя Максіма Танка, кандыдат гістарычных навук, эпіграфіст, выступіць з лекцыяй “Графіці Полацкай Спаса-Праабражэнскай царквы”.
Запісы мінулых лекцый і жывыя трансляцыі наступных можна будзе глядзець на канале YouTube па адрасе https://www.youtube.com/c/BelarusBook/videos.
Матэрыял пададзены аддзелам сувязей з грамадскасцю.
