20 чэрвеня ў музеі кнігі адбыліся чарговыя заняткі для дзяцей з цыклу “У госці да кніг” – “Францыск Скарына – беларускі першадрукар”.
Сустрэча ў музеі ператварылася ў займальную гутарку, у якой кожны прыняў актыўны ўдзел. Дзеці падарожнічалі з Францыскам Скарынам па карце Еўропы і даведаліся, дзе ён нарадзіўся, вучыўся і працаваў. Іх чакалі таксама вясёлыя творчыя заданні і гульні. Мэта заняткаў – не толькі адкрываць для хлопчыкаў і дзяўчынак навуковыя факты, а зацікавіць тэмай, каб у іх узнік імпульс самім нешта пазнаваць і даражыць гэтым.
Нацыянальная бібліятэка Беларусі – захавальніца арыгінальных кніг асветніка. Дзеці атрымалі ўнікальную магчымасць убачыць кнігі Скарыны, выдадзеныя ў Празе 500 гадоў таму.
Напрыканцы дзеці займаліся пазламі, якія склаліся ў яркія ілюстрацыі аб дзейнасці першадрукара.
На фота: удзельнікі заняткаў “Францыск Скарына – беларускі першадрукар” – вучні сярэдняй школы № 172 г. Мінска.
Заняткі арганізаваны ў рамках праекта “У госці да кніг”, накіраванага на развіццё цікавасці да кнігі, папулярызацыю нацыянальнай кніжнай спадчыны, фарміраванне гонару за дасягненні і багатыя традыцыі айчыннай кніжнай культуры.
Матэрыял прадастаўлены навукова-даследчым аддзелам кнігазнаўства.
