22 верасня ў Цэнтральнай бібліятэцы імя А.С. Пушкіна ДУК “Аршанская цэнтралізаваная бібліятэчная сістэма” адбылося адкрыццё перасоўнай фотавыставы “Нацыянальная бібліятэка Беларусі”.
Экспазіцыя прадстаўляе 24 працы вядомых фотамастакоў Беларусі. Аўтары ў ілюстрацыйнай форме паказваюць новую старонку стогадовай гісторыі галоўнай бібліятэкі краіны і яе новы будынак у самых яркіх і значных фрагментах, раскрываюць арыгінальныя рашэнні інтэр’ераў, новыя тэхналогіі ў абслугоўванні, знаёмяць з творамі жывапісу і прыкладнога мастацтва.
У адкрыцці выставы ўзялі ўдзел прадстаўнікі творчай інтэлігенцыі, супрацоўнікі бібліятэкі і навучэнцы 1 курса ДУА “Аршанскі каледж ВДУ імя П.М. Машэрава”.
Ганаровым госцем мерапрыемства стаў намеснік генеральнага дырэктара Нацыянальнай бібліятэкі Беларусі Віктар Пшыбытка. У прывітальным слове ён падзякаваў кіраўніцтву Аршанскай цэнтралізаванай бібліятэчнай сістэмы за прадстаўленую магчымасць пазнаёміць жыхароў Оршы з гісторыяй “алмаза ведаў”, яго архітэктурнымі асаблівасцямі і мастацкім афармленнем.
Перасоўны фотапраект прымеркаваны да 100-годдзя ўстановы і распавядае аб сучаснай Нацыянальнай бібліятэцы як аб найбуйнейшым інфармацыйным і сацыякультурным цэнтры краіны і ўнікальным сховішчы нацыянальных дакументаў.
Фотавыстава “Нацыянальная бібліятэка Беларусі” была прэзентавана ў буйных беларускіх гарадах – Віцебску і Брэсце. Наступнай пляцоўкай для экспанавання стане Гомельская абласная ўніверсальная бібліятэка імя У.І. Леніна.
Матэрыял пададзены аддзелам сувязей з грамадскасцю.