68 тысяч бібліяграфічных запісаў на дакументы, якія захоўваюцца ў бібліятэках Шклоўскага і Крычаўскага раёнаў, папоўнілі рэгіянальны блок ЗЭК бібліятэк Беларусі – РЗЭК бібліятэк Магілёўскай вобласці.
Дадзены рэсурс змяшчае звыш 540 тыс. бібліяграфічных запісаў на розныя віды дакументаў з лакальных электронных каталогаў бібліятэк – удзельніц РЗЭК, штодня папаўняецца актуальнай інфармацыяй аб новых паступленнях, дае звесткі пра месцазнаходжанне экзэмпляраў, дае чытачам унікальную магчымасць пошуку выданняў і фарміравання спісаў неабходных дакументаў у зводным рэсурсе і афармлення на іх заказаў.
Новымі партнёрамі па фарміраванні РЗЭК Магілёўскай вобласці сталі дзяржаўныя ўстановы культуры “Цэнтралізаваная бібліятэчная сетка Шклоўскага раёна” і “Бібліятэчная сетка Крычаўскага раёна”. Іх удзел будзе садзейнічаць развіццю як галоўнага рэгіянальнага бібліятэчнага інфармацыйнага рэсурсу, так і ЗЭК бібліятэк Беларусі ў цэлым.
Прапануем актыўна выкарыстоўваць рэсурсы зводнага каталога для пошуку неабходных вам матэрыялаў!
Матэрыял пададзены аддзелам бібліятэчна-інфармацыйных тэхналогій.