23 кастрычніка 2007 г. у Нацыянальнай бібліятэцы Беларусі адбыўся фінальны тур па пошуку ў Інтэрнэце на кубак Беларускай бібліятэчнай асацыяцыі.
У спаборніцтве ўдзельнічалі 19 супрацоўнікаў бібліятэк з усіх абласцей рэспублікі. Яны сталі лепшымі ў рэгіянальным туры. Сутнасць фінальнага тура конкурсу заключалася ў тым, каб як мага хутчэй знайсці ў Інтэрнэце правільныя адказы на 10 пытанняў. На кожнае пытанне ўдзельнікам адводзілася 6 хвілін. Дзякуючы спецыялізаванай платформе Яндэкс, што выкарыстоўваецца гэтай кампаніяй для правядзення падобных спаборніцтваў, журы ў рэжыме рэальнага часу магло назіраць за ходам спаборніцтваў. За першае месца ўпартая барацьба ішла паміж Кацярынай Крэнь і Марынай Сапоненка. Яны абедзве правільна адказалі на ўсё 10 пытанняў, але Кацярына змагла знайсці адказы хутчэй.
Пераможцамі сталі:
1 месца - Крэнь Кацярына Аляксандраўна, бібліятэкар 1-ай катэгорыі Нацыянальнай бібліятэкі Беларусі
2 месца - Сапоненка Марына Міхайлаўна, вядучы бібліятэкар Цэнтральнай гарадской дзіцячай бібліятэкі імя М.Астроўскага г. Мінска
3 месца - Трацяк Арцём Аляксеевіч, бібліятэкар Капыльскай цэнтральнай раённай бібліятэкі.
Удзельнікам і пераможцам былі ўручаны граматы і памятныя падарункі.
