24 красавіка ў бібліятэцы адбылося адкрыццё Першага гарадскога кніжнага фестывалю “Горад і кнігі”.
Арганізатарамі фестывалю выступілі Нацыянальная бібліятэка Беларусі, Беларуская бібліятэчная асацыяцыя, Навуковая бібліятэка Беларускага нацыянальнага тэхнічнага ўніверсітэта.
Гасцей маштабнага мерапрыемства сустракаюць на пяці тэматычных пляцоўках, дзе праходзяць сустрэчы з пісьменнікамі, ролевыя гульні, спектаклі, майстар-класы, віктарыны, выстаўкі і многае іншае.
На “Выставачнай пляцоўцы” размешчаны стэнды магазінаў і магазінчыкаў, бібліятэк з унікальнымі паслугамі. Тут жа можна пазнаёміцца з літаратурнымі аб’яднаннямі, культурнымі платформамі, а таксама прыняць удзел у прэзентацыі кніг.
“Дзіцячая пляцоўка” прысвечана маленькім чытачам і аматарам літаратуры. Інтэрактыўныя музычныя праграмы, тэатральныя пастаноўкі, сустрэчы з любімымі казачнымі героямі і аўтарамі дзіцячых кніг дораць дзецям нямала радасных хвілін.
На “Маладзёжнай пляцоўцы” можна пагутарыць з папулярнымі аўтарамі, задаць ім пытанні, паслухаць маладых літаратараў і прачытаць вершы самому.
Для спецыялістаў бібліятэчнай справы і пастаянных наведвальнікаў бібліятэк адкрыта “Бібліятэчная пляцоўка”, на якой прадстаўлены праекты мадэрнізацыі і альтэрнатыўнага выкарыстання бібліятэк для ўзмацнення іх ролі ў развіцці горада і культуры.
Пляцоўка “Стол майстар-класаў” цікавая ўсім, хто любіць не толькі чытаць, але і рабіць штосьці сваімі рукамі. Усё ахвотныя могуць зрабіць арыгінальныя закладкі-цацкі, дэкупіраваць кніжную вокладку з тканіны. Акрамя таго, можна далучыцца да працэсу стварэння тактыльнай копіі кнігі для невідушчых дзяцей.
Фестываль “Горад і кнігі” працягвае здзіўляць сваіх гасцей і 25 красавіка. На закрыцці арганізатары мерапрыемства абяцаюць акцыю-віктарыну “Кніга ў мяшку”, кніжны торт і яшчэ масу ўсяго цікавага.