18 чэрвеня эстафета II Еўрапейскіх гульняў “Полымя міру” стартавала ля Нацыянальнай бібліятэкі Беларусі.
Ля цэнтральнага ўваходу галоўнай бібліятэкі мінчан і гасцей сталіцы чакаў музычны батл “Песні пра спорт”. Яркімі творчымі нумарамі публіку парадавалі заслужаны артыст Рэспублікі Беларусь Уладзімір Правалінскі, а таксама Дзмітрый Сяргееў, Жанет, Аляксандр Сухараў, групы “Бай сіці”, “Правакацыя”, “Дразды” і арт-група “Беларусы”.
Упрыгожыла мерапрыемства харэаграфічная кампазіцыя ў выкананні артыстаў балета Вялікага тэатра Беларусі і дзіцячай студыі сучаснага балета пры ансамблі танца “Страказа”.
Напрыканцы канцэрта публіка ўсхвалявана чакала цырымоніі запальвання паходні. Прыбыўшых захавальнікаў агню павітаў кіраўнік адміністрацыі Першамайскага раёна г. Мінска Ігар Кудрэвіч. Першай, хто пранёс “Полымя міру” па галоўным праспекце горада, стала беларуская біятланістка, алімпійская чэмпіёнка Надзея Скардзіна.
Эстафета агню II Еўрапейскіх гульняў будзе ісці па Мінску яшчэ тры дні, пасля чаго 21 чэрвеня фінішуе на мінскім стадыёне “Дынама”.
Матэрыял прадастаўлены аддзелам сувязей з грамадскасцю.
