24 лютага 2009 года а 17-й гадзіне ў мабільнай галерэі Нацыянальнай бібліятэкі Беларусі (3-і паверх) адбудзецца ўрачыстае адкрыццё гісторыка-мастацкай выстаўкі «Эмерык фон Гутэн-Чапскі. На фоне эпохі».
Выстаўка падрыхтавана сумесна з Прылуцкім цэнтрам народнай творчасці і прысвечана юбілею Эмерыка фон Гутэн-Чапскага.
17 лістапада 2008 года споўнілася 180 год з дня нараджэння знакамітага калекцыянера графа Эмерыка фон Гутэн-Чапскага (1828-1896) – самага славутага прадстаўніка роду Чапскіх, якія пасяліліся на Міншчыне ў другой палове XVIII стагоддзя. Эмерык Чапскі скончыў Маскоўскі універсітэт са ступенню кандыдата прыродазнаўчых навук, займаў пасады віцэ-губернатара Санкт-Пецярбурга і губернатара Ноўгарада. Пазней ён стаў дырэктарам ляснога дэпартамента Міністэрства дзяржаўнай маёмасці Расіі. Пасля адстаўкі Эмерык Чапскі пасяліўся ў Станькаве, сабраў вялікую бібліятэку і пачаў папаўняць нумізматычную і іншыя калекцыі старажытнасцяў. Актыўная навуковая работа Чапскага была адзначана вялікім сярэбраным медалём Рускага археалагічнага таварыства. Большую частку сваіх збораў Эмерык Чапскі перавёз у Кракаў – старажытную сталіцу Польшчы. Там гэтыя калекцыі сталі асновай Нацыянальнага музея. Затым у Кракаў паступілі архівы нашчадкаў Эмерыка Чапскага.
На мінскай зямлі граф Эмерык фон Гутэн-Чапскі стварыў вялікі адміністрацыйна-гаспадарчы комплекс – Станькаўскі ключ, у склад якога ў 1871 годзе ўвайшоў і маёнтак Прылукі. З 2001 года ў Прылуках на базе цэнтра народнай творчасці дзейнічае народнае гісторыка-краязнаўчае аб'яднанне «Прылуцкая спадчына». Тут сабрана вялікая колькасць матэрыялаў пра жыццё і дзейнасць графа Эмерыка фон Гутэн-Чапскага і іншых прадстаўнікоў роду Чапскіх.
З нагоды юбілейнай даты Прылуцкі цэнтр народнай творчасці прадстаўляе выстаўку, якая складаецца са стэндаў «Прылукі праз вякі: XV-XXI стагоддзі», мастацкіх твораў (партрэты Эмерыка Чапскага і іншых прадстаўнікоў роду Чапскіх, габелены на гістарычную тэматыку), а таксама кніг, альбомаў, архіўных дакументаў з фондаў аб'яднання «Прылуцкая спадчына».
Нацыянальная бібліятэка Беларусі ў сваёй частцы экспазіцыі прадставіць шэраг дакументаў, якія распавядаюць пра жыццё і дзейнасць Эмерыка Чапскага і яго славутых нашчадкаў.
Выстаўка будзе працаваць да 23 сакавіка 2009 года.
Уваход цэнтральны.
Тэлефоны для даведак: 293-28-23, 293-27-67.
Е-mail: pr@nlb.by