Віртуальная чытальная зала Нацыянальнай бібліятэкі Беларусі працягвае знаёміць карыстальнікаў з вядучымі сусветнымі інфармацыйнымі рэсурсамі. 28 мая ў бібліятэцы прайшоў семінар “Электронныя рэсурсы ProQuest у інфармацыйным ландшафце сучасных бібліятэк і ВНУ”.
Гасцям былі прадстаўлены інфармацыйныя рэсурсы аднаго з найбуйнейшых сусветных агрэгатараў навуковай электроннай інфармацыі: электронныя кнігі, дысертацыі і алічбаваныя архівы на электроннай платформе ProQuest.
У базе даных дысертацый “ProQuest Dissertations & Theses Global” беларускія вучоныя могуць не толькі атрымаць інфармацыю пра сучасныя дасягненні ў навуцы, але і прадставіць міжнароднай навуковай супольнасці вынікі ўласных даследаванняў.
Алгарытмы выкарыстання інфармацыйных рэсурсаў і папулярызацыі вынікаў уласных навуковых даследаванняў для ўдзельнікаў семінара раскрылі Ганна Трыфанава, кіраўнік рэгіянальных праектаў кампаніі ProQuest, і Аляксандр Ліпенскі, дырэктар аддзела электронных рэсурсаў падпіснога агенцтва МЕТЭК.
На семінары таксама прагучалі станоўчыя водгукі супрацоўнікаў аддзела даведачна-інфармацыйнага абслугоўвання бібліятэкі аб кантэнце і пошукавых магчымасцях баз даных ProQuest.
Для карыстальнікаў Нацыянальнай бібліятэкі Беларусі адкрыты доступ да калекцый навуковых дысертацый і электронных кніг на платформе ProQuest. Запрашаем да супрацоўніцтва ўстановы вышэйшай і сярэдняй адукацыі, публічныя і спецыяльныя бібліятэкі, інфармацыйныя цэнтры краіны.
Матэрыял прадастаўлены аддзелам карпаратыўнага ўзаемадзеяння.