11 лютага ў рамках “Бібліятэчнага дня”, які традыцыйна праходзіць на ХVII Мінскай міжнароднай кніжнай выстаўцы-кірмашы, ладзіўся круглы стол “Электронная кніга – кніга сучаснага і будучага”.
Арганізатарамі мерапрыемства выступілі Міністэрства інфармацыі Рэспублікі Беларусь і Нацыянальная бібліятэка Беларусі.
У рабоце круглага стала бралі ўдзел кіраўнікі бібліятэк, выдавецтваў, Нацыянальнай кніжнай палаты Рэспублікі Беларусь, спецыялісты Нацыянальнага цэнтра інтэлектуальнай уласнасці, а таксама прадстаўнікі кнігагандлёвых прадпрыемстваў.
У рамках штогадовай кніжнай выстаўкі-кірмашу бібліятэкары, кнігавыдаўцы і кнігараспаўсюджвальнікі збіраюцца ўжо пяты год.
Падчас сустрэчы за круглым сталом былі абмеркаваны пытанні выдання і распаўсюджвання электронных кніг, камплектавання імі бібліятэчных фондаў, былі ўзняты праблемы дзяржаўнага ўліку электронных выданняў, захавання аўтарскага права пры іх вытворчасці. Удзельнікі мерапрыемства аднадушна пагадзіліся з меркаваннем, што перад бібліятэкамі, кнігавыдавецкімі і кнігагандлёвымі арганізацыямі стаяць рад задач, якія яшчэ належыць вырашыць па пытаннях вытворчасці, распаўсюджвання і выкарыстання электронных выданняў.
У “Бібліятэчны дзень” усе кнігавыдаўцы вялікую ўвагу надаюць наладжванню сувязей з бібліятэкамі як сваімі даўнімі і найбольш зацікаўленымі партнёрамі.
За шматгадовае плённае супрацоўніцтва і прапаганду беларускай кнігі Нацыянальнай бібліятэцы Беларусі быў уручаны Дыплом Міністэрства інфармацыі Рэспублікі Беларусь.
Падчас круглага стала па выніках творчага праекта “Кнігі з аўтографамі пісьменнікаў Беларусі – у бібліятэкі краіны” былі ўручаны ўзнагароды пераможцам – дырэктарам цэнтральных бібліятэк бібліятэчных сетак Пінскага раёна Брсцкай вобласці, горада Наваполацка Віцебскай вобласці, Буда-Кашалёўскага раёна Гомельскай вобласці, Ваўкавыскага раёна Гродзенскай вобласці, Крычаўскага раёна Магілёўскай вобласці, Лагойскага і Салігорскага раёнаў Мінскай вобласці. Усе пераможцы атрымаюць унікальныя прызы – па 100 экзэмпляраў кніг з аўтографамі беларускіх пісьменнікаў.
Работа круглага стала з года ў год становіцца ўсё больш плённай і адлюстроўвае рэальныя вынікі ўзаемавыгаднага супрацоўніцтва. Бо ў рэшце рэшт усе звёны ланцужка "выдавец – кнігараспаўсюджвальнік – бібліятэка" працуюць дзеля адной мэты – найбольш поўнага задавальнення інфармацыйных патрэбнасцей чытачоў.
 |
||
 |
 |
