26 жніўня ў бібліятэцы ўпершыню была праведзена экскурсія з наведваннем Круглай залы Прэзідэнт-цэнтра, якая афіцыйна ўведзена ў прэйскурант платных паслуг.
Першымі наведвальнікамі гэтай экскурсіі сталі супрацоўнікі Мінскага гарадскога ўпраўлення Дэпартамента аховы МУС Рэспублікі Беларусь.
Падчас экскурсіі госці не толькі наведалі залу, дзе праходзяць шматлікія мерапрыемствы на вышэйшым узроўні з удзелам кіраўнікоў дзяржаў і ўрадаў, прадстаўнікоў дыпламатычных місій, вучоных і дзеячаў культуры, але і змаглі зрабіць памятныя фатаграфіі інтэр’еру аднаго з самых значных месцаў будынка бібліятэкі.
Таксама экскурсанты даведаліся пра архітэктурныя асаблівасці “дыямента ведаў”, мастацкае афармленне бібліятэкі, атрымалі незабыўныя ўражанні ад пад’ёму на панарамным ліфце на адкрытую аглядную пляцоўку.
Падчас экскурсій па бібліятэцы група наведала адну з мастацкіх галерэй, дзе азнаёмілася з выстаўкай работ вядомых беларускіх і замежных майстроў “Лета ў правінцыі”.