Экскурсія “Славутыя імёны Бацькаўшчыны” – гэта магчымасць пазнаёміцца з жыццём вядомых беларусаў падчас вандроўкі па будынку Нацыянальнай бібліятэкі Беларусі.
18 лістапада такой магчымасцю скарысталіся студэнты з Туркменістана, якія навучаюцца на гістарычным факультэце Беларускага дзяржаўнага ўніверсітэта. Напярэдадні дня нараджэння класіка беларускай літаратуры Максіма Багдановіча яны прынялі ўдзел у экскурсіі, прысвечанай яго творчасці.
У межах экскурсіі маладыя людзі пазнаёміліся з архітэктурай, мастацкім афармленнем бібліятэкі, сістэмай заказу, дастаўкі і выдачы літаратуры, знайшлі ў электронным каталозе і заказалі кнігі на туркменскай мове. У чытальнай зале рукапісаў, рэдкай кнігі і старадрукаў студэнты змаглі ўбачыць унікальнае прыжыццёвае выданне адзінага паэтычнага зборніка Максіма Багдановіча “Вянок” з дароўным надпісам, пакінутым рукой паэта. Акрамя таго, да ўвагі гасцей былі прадстаўлены іншыя рэдкія дакументы з фондаў бібліятэкі, а таксама з калекцыі вядомага беларускага калекцыянера У. Ліхадзедава.
Частка экскурсіі прайшла ў выглядзе інтэрактыўных заняткаў, падчас якіх экскурсанты пазнаёміліся з фактамі біяграфіі паэта, яго кнігамі з фондаў Нацыянальнай бібліятэкі Беларусі. У канцы экскурсіі госці падняліся на аглядную пляцоўку і палюбаваліся Мінскам з вышыні птушынага палёту.
Запрашаем на экскурсіі “Славутыя імёны Бацькаўшчыны” ўсіх, хто цікавіцца беларускай культурай, гісторыяй і літаратурай.
Запісацца на экскурсіі па творчасці Максіма Багдановіча, Янкі Купалы, Якуба Коласа, Кандрата Крапівы, Уладзіміра Караткевіча, Васіля Быкава, Янкі Маўра, Міхася Зарэцкага, Францыска Скарыны можна па тэлефонах: (8 017) 293 28 53, (8 017) 293 29 66.
Матэрыял пададзены аддзелам экскурсійна-метадычнай работы.