14 кастрычніка ў Дзень маці ў бібліятэцы адбылася экскурсія для мам выхаванцаў гурткоў і студый Забалоцкага сельскага Дома культуры Смалявіцкага раёна.
Бацькі, якія клапоцяцца пра эстэтычнае і інтэлектуальнае развіццё сваіх дзяцей, а таксама самі прымаюць актыўны ўдзел у грамадскім і культурным жыцці свайго раёна, пазнаёміліся з цікавымі фактамі з гісторыі Нацыянальнай бібліятэкі, асаблівасцямі яе архітэктуры, сістэмай дастаўкі дакументаў, экспазіцыяй музея кнігі.
Напрыканцы мерапрыемства госці падняліся на аглядную пляцоўку, дзе іх чакаў сюрпрыз: дваццаць другі паверх сустрэў мам чароўнымі гукамі лёгкага джаза. У фотазоне, падрыхтаванай адмыслова да свята, з музычным віншаваннем выступіў студэнт Беларускай дзяржаўнай акадэміі музыкі Сяргей Радзівончык. Музыкант падзяліўся добрым настроем не толькі з удзельнікамі экскурсіі, але і з наведвальнікамі агляднай пляцоўкі. Фінальным акордам стала ўручэнне мамам кветак і памятных сувеніраў.
Матэрыял прадастаўлены аддзелам экскурсійна-метадычнай работы.