23 сакавіка ў бібліятэцыі для вучняў дзіцячага развіваючага цэнтра “Алёнка” (г. Брэст) прайшла экскурсія “Славутыя імёны Бацькаўшчыны” па творчасці Марка Шагала.
Дзеці прыехалі ў Мінск для ўдзелу ў V Міжнародным конкурсе “Скрыжаванні. Мінск” і наведалі Нацыянальную бібліятэку Беларусі. Тэму экскурсіі госці выбралі не выпадкова – большасць з іх займаюцца выяўленчым мастацтвам.
Госці пазнаёміліся з архітэктурнымі асаблівасцямі “алмаза ведаў”, экспазіцыяй музея кнігі, мастацкім афармленнем інтэр'ераў будынка. Затым навучэнцаў і іх бацькоў чакаў інтэрактыўны занятак, прысвечаны Марку Шагалу. Дзеці пазнаёміліся з цікавымі фактамі аб вялікім земляку і выканалі творчыя заданні з дапамогай інтэрактыўнай панэлі. Таксама юныя мастакі распавялі пра сябе і прадэманстравалі некалькі альбомаў са сваімі работамі.
Скончылася экскурсія на агляднай пляцоўцы: на 22-м паверсе госці змаглі зрабіць замалёўкі наваколляў Нацыянальнай бібліятэкі Беларусі – як яны ўбачылі іх з вышыні звыш 70 метраў.
Спадзяемся, што натхнілі рабят на творчасць, і чакаем усіх, хто цікавіцца мастацтвам, гісторыяй і літаратурай на экскурсіях з цыклу “Славутыя імёны Бацькаўшчыны”.
Матэрыял прадастаўлены экскурсійна-метадычным аддзелам.