12 кастрычніка, напярэдадні святкавання Дня маці, аддзелам экскурсійна-метадычнай работы была арганізавана і праведзена экскурсія па будынку бібліятэкі.
28 шматдзетных маці, удастоеных дзяржаўнай узнагароды – ордэна Маці, і члены іх сем’яў азнаёміліся з архітэктурнымі асаблівасцямі будынка, работай чытальных залаў, атрымалі ўяўленне пра багатыя калекцыі і шматгранную дзейнасць бібліятэкі, а таксама наведалі выстаўку жывапісу “Прагулка па сталіцы” ў галерэі “Атрыум”.
З захапленнем дзеці і іх мамы любаваліся размешчанымі ў кальцавых калідорах мастацкімі творамі, якія ствараюць непаўторны вобраз Нацыянальнай бібліятэкі.
Жывую цікавасць у дарослых і дзяцей выклікаў музей кнігі, дзе іх пазнаёмілі з экспазіцыяй рукапісаў, рэдкіх і старадрукаваных выданняў. Юныя госці актыўна адказвалі на пытанні экскурсавода пра літаратуру Беларусі, жыццё і творчасць Ф. Скарыны.
Завяршылася экскурсія на агляднай пляцоўцы, дзе прысутныя ўбачылі панараму горада.