12, 14 і 16 кастрычніка ў бібліятэцы прайшла серыя анлайн-семінараў для бібліятэк Беларусі.
Семінары былі арганізаваны з мэтай прыцягнення ўвагі супрацоўнікаў і кіраўнікоў бібліятэк да выкарыстання ў бібліятэчным абслугоўванні лепшых сусветных электронных інфармацыйных рэсурсаў. З іх багатым кантэнтам і функцыянальнымі магчымасцямі слухачоў пазнаёмілі загадчыца аддзела карпаратыўнага ўзаемадзеяння Марына Рудакоўская і спецыяліст аддзела Дар’я Рымша. На заключным семінары ў якасці запрошанага спікера выступіў дырэктар па развіцці кампаніі EBSCO Андрэй Сакалоў.
Штодня ў семінарах прымалі ўдзел прадстаўнікі больш за 40 арганізацый: публічных, навуковых, універсітэцкіх і школьных бібліятэк, інстытутаў павышэння кваліфікацыі і перападрыхтоўкі.
Ключавой тэмай семінараў сталі алгарытмы выкарыстання электронных баз даных пры дыстанцыйнай адукацыі і аддаленым бібліятэчным абслугоўванні, а таксама перавагі карпаратыўнай падпіскі на ліцэнзійныя інфармацыйныя рэсурсы.
Серыя семінараў была праведзена пад эгідай Савета бібліятэк Беларусі па інфармацыйным узаемадзеянні.
Запрашаем бібліятэкі Беларусі да супрацоўніцтва ў рамках віртуальнай чытальнай залы Нацыянальнай бібліятэкі Беларусі!
Матэрыял пададзены аддзелам карпаратыўнага ўзаемадзеяння.
