2 снежня ў бібліятэцы адбылося падвядзенне вынікаў раённага літаратурнага конкурсу “Дэбют”, прысвечанага творчасці пачынаючых паэтаў і пісьменнікаў.
Конкурс мае больш чым 20-гадовую гісторыю і па-ранейшаму прыцягвае ўвагу аматараў літаратурнай творчасці, садзейнічае раскрыццю новых талентаў, рэалізацыі творчага патэнцыялу жыхароў Першамайскага раёна г.Мінска.
У склад журы ўвайшлі заслужаны дзеяч культуры Рэспублікі Беларусь, лаўрэат Дзяржаўнай літаратурнай прэміі Рэспублікі Беларусь за творы для дзяцей, галоўны рэдактар часопіса “Вясёлка” Уладзімір Ліпскі, генеральны дырэктар рэдакцыі газеты “Шапокляк”, мастак-карыкатурыст Анатоль Гармаза, аглядальнік рэдакцыі газет “Минский курьер” і “Вечерний Минск” Сяргей Пяткоўскі, беларускі пісьменнік, член прэзідыума Саюза пісьменнікаў Беларусі Віктар Праўдзін, старшыня Мінскага гарадскога аддзялення Беларускага фонду міру Дзмітрый Карань і беларуская паэтка, празаік, драматург Раіса Баравікова. Эксперты ацанілі работы ўдзельнікаў па трох напрамках: “Мы адзін народ – у нас адна краіна!”, “Новы дзень, якім я яго ўбачыў раніцай…”, “Стихи рождаются в любви”. Пераможцамі і прызёрамі конкурсу сталі 50 удзельнікаў.
Арганізатарамі ўрачыстай цырымоніі ўзнагароджання выступілі Нацыянальная бібліятэка Беларусі і Адміністрацыя Першамайскага раёна г. Мінска.
Матэрыял пададзены аддзелам сувязей з грамадскасцю.