20 мая адбылася ўрачыстая цырымонія перадачы Нацыянальнай бібліятэцы Беларусі збору твораў Хасэ Марці ў дар ад Пасольства Рэспублікі Куба ў Рэспубліцы Беларусь.
З вітальным словам да гасцей звярнуліся намеснік міністра культуры Рэспублікі Беларусь Віктар Іосіфавіч Кураш, Надзвычайны і Паўнамоцны Пасол Рэспублікі Куба ў Рэспубліцы Беларусь Амар Сенон Медзіна Кінтэра і дырэктар ДУ “Нацыянальная бібліятэка Беларусі” Раман Сцяпанавіч Матульскі.
Ва ўрачыстай абстаноўцы Надзвычайны і Паўнамоцны Пасол Рэспублікі Куба Амар Сенон Медзіна Кінтэра перадаў у дар Нацыянальнай бібліятэцы Беларусі першыя 9 з 28 тамоў збору твораў “Edicion Critica” (Крытычнае выданне”) нацыянальнага героя Кубы Хасэ Марці (1853–1895).
Сабраныя ў гэтым выданні працы з’яўляюцца копіямі рукапісаў Хасэ Марці. Выданне ўключае таксама друкаваныя матэрыялы: хронікі, журналісцкую карэспандэнцыю, артыкулы, нарысы, звароты, кароткую біяграфічную характарыстыку, паэмы, навелы, тэатральныя творы, лісты, публічныя прамовы, пісьмовыя паведамленні, маніфесты, прысвячэнні, чарнавікі, сшыткі для нататак, фрагменты сачыненняў, няпоўныя анатацыі, пераклады і малюнкі.
У рамках мерапрыемства выступілі студэнты Мінскага дзяржаўнага лінгвістычнага універсітэта, якія прачыталі творы Хасэ Марці на іспанскай мове, а таксама навучэнцы музычнай школы № 3 Мінска.
Цырымонія дарэння стала працягам культурнага супрацоўніцтва паміж Беларуссю і Кубай, якое садзейнічае замацаванню традыцыйных сяброўскіх адносін.
 |
 |
 |
 |
 |
 |
