28 верасня ў бібліятэцы адбылася цырымонія перадачы ў дар выданняў "Денежная азбука" і "Финансовый футбол 2.0".
"Денежная азбука" – адзін з шэрагу праектаў, арганізаваных Асацыяцыяй беларускіх банкаў пры падтрымцы кампаній-партнёраў у рамках нацыянальнай кампаніі па павышэнні фінансавай пісьменнасці ў нашай краіне. У дадзеным выпадку выпуск кнігі падтрымалі Нацыянальны банк Рэспублікі Беларусь і газета "Комсомольская правда в Беларуси".
Папярэдні, не менш пазнавальны праект быў рэалізаваны ў 2015 годзе. Тады фонд Нацыянальнай бібліятэкі Беларусі папоўнілі 100 экзэмпляраў выдання "Финансовая грамота" – акадэмічнага дапаможніка па асабістых фінансах, дзе ў лёгкай і нязмушанай форме гаворыцца пра тое, як паспяхова распараджацца асабістым бюджэтам, якія інструменты інвеставання можна выкарыстоўваць для аховы і прымнажэння зберажэнняў.
Як адзначыла падчас цырымоніі першы намеснік дырэктара Нацыянальнай бібліятэкі Беларусі Алена Далгаполава, экзэмпляры леташняга падарунка – "Финансовой грамоты" – былі размеркаваны па бібліятэках краіны і карысталіся шырокім попытам сярод чытачоў, таму і ў гэты раз Нацыянальная бібліятэка з усёй адказнасцю падыдзе да папулярызацыі выданняў.
"Денежная азбука" прызначана для дзяцей малодшага і сярэдняга школьнага ўзросту. Кніга багатая ілюстрацыямі, якія суправаджаюцца даступным для разумення тэкстам. Тут можна даведацца пра гісторыю грошай, іх назвы і знешні выгляд у мінулым і сучаснасці. Падрастаючае пакаленне зможа прачытаць у азбуцы, для чаго наогул патрэбныя грошы і як з імі абыходзіцца.
Таксама падчас сустрэчы адбылася прэзентацыя адукацыйнай камп’ютарнай гульні "Финансовый футбол 2.0", запуск якой стаў магчымым дзякуючы супрацоўніцтву Асацыяцыі беларускіх банкаў з кампаніяй VISA. Гульня "Финансовый футбол 2.0" – гэта абноўленая лакалізаваная версія займальнай гульні для атрымання фінансавых ведаў. Першая яе версія была запушчана ў Беларусі ў 2010 годзе. Гульня правярае веды гульца ў галіне кіравання асабістымі фінансамі і вучыць пісьменна распараджацца сваімі грашыма па меры таго, як гулец набліжаецца да варот саперніка, каб забіць гол. Тут прадугледжаны тры ўзроўні складанасці – для старшакласнікаў, студэнтаў і больш дарослай аўдыторыі.
"На жаль, для вывучэння спецыяльнай літаратуры, якая можа павысіць фінансавую пісьменнасць, чалавеку даводзіцца прыкладаць намаганні, а элемент гульні спрашчае гэтую задачу і прыцягвае ўвагу большага кола людзей", – падкрэсліў значнасць адукацыйнай гульні рэгіянальны менеджар кампаніі VISA ў Беларусі, Малдове і Азербайджане Ігар Кавалёў. Яго словы знайшлі нагляднае пацвярджэнне – госці мерапрыемства з радасцю падзяліліся на каманды і згулялі ў "Финансовый футбол 2.0" анлайн.
Дыскі з гульнёй "Финансовый футбол 2.0" таксама былі перададзены ў дар Нацыянальнай бібліятэцы Беларусі.