31 студзеня а 17-й гадзіне ў галерэі “Ракурс” ладзіцца літаратурна-творчая сустрэча, прысвечаная лаўрэатам прэміі “За духоўнае адраджэнне” і спецыяльнай прэміі Прэзідэнта Рэспублікі Беларусь дзеячам культуры і мастацтва 2011 года.
Сустрэча адбудзецца ў рамках адкрыцця кніжна-ілюстрацыйнай выстаўкі “Вялікі талент, вялікая работа, вялікае сэрца”.
Прэмія Прэзідэнта Рэспублікі Беларусь “За духоўнае адраджэнне” прысуджаецца штогод за выдатныя творы літаратуры і мастацтва, актыўную падзвіжніцкую дзейнасць у гуманітарнай сферы, скіраваную на развіццё і ўмацаванне духоўных каштоўнасцей.
З нагоды ўзнагароджання лаўрэатаў Нацыянальная бібліятэка Беларусі традыцыйна арганізоўвае кніжна-ілюстрацыйную выстаўку, на якой прадстаўлены шматлікія матэрыялы з розных фондаў бібліятэкі пра ўсіх лаўрэатаў, якія сваім мастацтвам і плённай працай славяць родную Беларусь. Гэта кнігі, выяўленчыя матэрыялы (плакаты, фота), перыядычныя выданні.
Ва ўрачыстым мерапрыемстве прымуць удзел прадстаўнікі розных творчых калектываў. Для гасцей выступяць студэнты прафесара Беларускай дзяржаўнай акадэміі музыкі Яўгена Гладкова, а таксама харэаграфічны ансамбль “Зорка” дзяржаўнай установы «Цэнтр культуры “Віцебск”».
Кантактны тэлефон: 293-27-67.
Е-mail: pr@nlb.by
