15 лістапада ў бібліятэцы па благаславенні Мітрапаліта Мінскага і Заслаўскага Паўла, Патрыяршага Экзарха ўсяе Беларусі адбудзецца прэзентацыя кнігі “Новы Запавет Госпада нашага Ісуса Хрыста” на сучаснай беларускай мове.
Арганізатары − Выдавецкі савет Беларускай праваслаўнай царквы і Нацыянальная бібліятэка Беларусі.
У 2017 годзе ў жыцці Беларусі адбылася знамянальная падзея – да 500-годдзя з дня выдання Францыскам Скарынам першай кнігі Бібліі Беларускай праваслаўнай царквой выдадзены Новы Запавет на сучаснай беларускай мове.
Да сённяшняга дня ні адзін з раней зробленых перакладаў не мог лічыцца афіцыйным, паколькі ўсе яны былі аўтарскімі і не заўсёды адпавядалі нормам сучаснай беларускай мовы і царкоўнай тэрміналогіі.
“Новы Запавет Госпада нашага Ісуса Хрыста” – вынік саборнай перакладчыцкай дзейнасці членаў Біблейскай камісіі БПЦ у супрацоўніцтве з Біблейскім таварыствам у Рэспубліцы Беларусь. Пераклад зроблены са старажытнагрэчаскага тэксту, які традыцыйна ўжываецца ў праваслаўнай царкве. У працэсе работы Біблейская камісія аналізавала і ўлічвала ранейшыя спробы перакладу Святога Пісання на беларускую мову. Выкарыстоўваліся таксама розныя пераклады Бібліі на рускую, украінскую, польскую, англійскую і іншыя мовы.
У мерапрыемстве прымуць удзел прадстаўнікі духавенства Беларускага экзархата, кіраўнікі Міністэрстваў культуры, адукацыі, інфармацыі Рэспублікі Беларусь і іншых дзяржаўных устаноў, вучоныя інстытутаў Нацыянальнай акадэміі навук Беларусі, выкладчыкі і навучэнцы духоўных школ.
Падчас прэзентацыі можна будзе пазнаёміцца з выстаўкай выданняў перакладаў кніг Бібліі на беларускую мову з фондаў Нацыянальнай бібліятэкі Беларусі.
Пачнецца мерапрыемства а 15 гадзіне ў атрыуме 2-га паверха.
Тэлефон для даведак: (8 017) 266 37 37.
Е-mail: pr@nlb.by
