Акунуцца ў чароўную атмасферу навагодняга свята запрашае казка “Час навагодніх цудаў”.
Новы год – гэта свята, напоўненае незвычайнымі сюрпрызамі і чараўніцтвам. Пераканацца ў гэтым можна на навагоднім спектаклі “Час навагодніх цудаў”, які ладзіць Нацыянальная бібліятэка Беларусі.
Займальны сюжэт, бязмежная фантазія, нястрымная весялосць зробяць немагчымае – магчымым, а казку – быллю.
Хруст галінак, звон ледзяшоў, журчанне ручая, які не замярзае нават ўзімку, – вось ён, самы цудоўны навагодні казачны лес. Тут жыве Дзед Мароз, зберагаюцца казкі і хаваюцца таямніцы. Жыхары зімовага лесу рыхтуюцца сустрэць галоўнае свята зімы – Новы год. Апалонік Пятроўна, шэф-повар у палацы Дзеда Мароза, ведае, чым парадаваць і пачаставаць Дзядулю са Снягуркай і іх гасцей. Яе памочнікі – паварчукі Чарпачок і Відэльчык – з задавальненнем ёй дапамагаюць.
Толькі Павучыльда Вераломная пляце сваё снежнае павуцінне, аблытваючы ім казачны лес. Яна жадае толькі аднаго – каб ва ўсіх прапаў навагодні настрой і ўсе забыліся пра Новы год.
Ці атрымаецца ў Павучыльды Вераломнай здзейсніць свой намер і заблытаць уважлівых гледачоў? Ці змогуць яны дапамагчы Дзеду Марозу прадухіліць яе злосны намер? Ці запаляцца агні на галоўнай ёлцы ў казачным лесе і якія сюрпрызы чакаюць дзяцей і дарослых? – Гледачы даведаюцца падчас навагодняга спектакля.
Спяшайцеся, перад пачаткам прадстаўлення вас чакае забаўляльная гульнявая праграма з удзелам казачных герояў, паказ навагодніх касцюмаў і, вядома ж, карагод ля святочнай ёлкі.
Чакаем вас 26 снежня а 18 гадзіне па адрасе: пр. Незалежнасці, 116, канферэнц-зала Нацыянальнай бібліятэкі Беларусі.
Кошт квітка – 8 бел. руб. (аплата за наяўны і безнаяўны разлік).
За дадатковую плату будуць прапанаваны фота на памяць, аквагрым, буфет, продаж паветраных шароў і сувеніраў.
Тэлефоны для даведак: (8 017) 293 25 56, 293 25 57.