24–25 красавіка ва Ургенчы (Узбекістан) праходзіць XIII Міжнародная канферэнцыя “Central Asia – 2019: Інфармацыйна-бібліятэчныя рэсурсы ў навуцы, адукацыі, культуры і бізнесе”, у якой прымае ўдзел дырэктар Нацыянальнай бібліятэкі Беларусі Раман Матульскі.
Штогод канферэнцыя садзейнічае эфектыўнаму абмену вопытам па праблемах фарміравання электронных інфармацыйных рэсурсаў, стварэнні бібліятэчных сістэм і іх выкарыстання ў інфармацыйна-бібліятэчных установах, установах сістэмы адукацыі, архівах, музеях; стварэнні творчых аб’яднанняў / кансорцыумаў па сумесным выкарыстанні інфармацыйна-бібліятэчных (перш за ўсё электронных) рэсурсаў, арганізацыі і эксплуатацыі навучальных цэнтраў па навучанні новым інфармацыйным тэхналогіям у інфармацыйна-бібліятэчнай справе; актывізуе інфармацыйна-бібліятэчныя і адукацыйныя ўстановы для больш шырокага выкарыстання магчымасцей Інтэрнэту, электронных баз даных, забеспячэння адкрытага доступу да інфармацыйных рэсурсаў і фарміравання іх зместу.
На працягу двух дзён удзельнікі абмяркуюць сучасныя тэндэнцыі ў сферы кнігавыдавецтва, пытанні далучэння насельніцтва, у прыватнасці моладзі, да чытання кніг і развіццё бібліятэчнай справы з улікам сучасных тэхналогій. У рамках канферэнцыі пройдзе серыя майстар-класаў, прысвечаных знаёмству з праграмным комплексам агульнаадукацыйнай электроннай бібліятэкі Узбекістана “UzNEL”.
24 красавіка ў канферэнц-зале “Маънавият-маърифат маркази” Харэзмскай вобласці адбылося пленарнае пасяджэнне ўдзельнікаў канферэнцыі. З прывітальным словам на ўрачыстым адкрыцці выступіў Раман Матульскі, адзначыўшы, што канферэнцыя – гэта не толькі пляцоўка для сяброўскіх сустрэч, абмену вопытам, але і магчымасць павысіць прафесійную кваліфікацыю, умацаваць культурныя, навуковыя і адукацыйныя сувязі. У завяршэнне сваёй прамовы ён пажадаў удзельнікам канферэнцыі выніковай работы, плённых дыскусій і новых творчых поспехаў.
У гэты ж дзень Раман Сцяпанавіч падзяліўся з замежнымі калегамі вопытам працы беларускага “алмаза ведаў”, выступіўшы з дакладам “Дзейнасць Нацыянальнай бібліятэкі Беларусі па віртуальнай рэканструкцыі помнікаў кніжнай культуры”.
Вяртанне, захаванасць і папулярызацыя культурнай спадчыны – прыярытэтны напрамак дзейнасці Нацыянальнай бібліятэкі Беларусі. У рамках канферэнцыі Раман Матульскі перадаў у дар дырэктару Нацыянальнай бібліятэкі Узбекістана імя Алішэра Наваі Умідэ Ташабаевай факсіміле першай у свеце кнігі пад назвай “Буквар”. Выданне раскрывае ўсю значнасць і ўнікальнасць помніка і прызначана садзейнічаць папулярызацыі лепшых узораў кніжнай культуры беларускага народа, захаванню яго духоўнай спадчыны.
25 красавіка ўдзельнікі канферэнцыі працягнуць працу ў секцыях, прымуць удзел у майстар-класах і круглых сталах. Азнаёміцца з праграмай канферэнцыі, дакладчыкамі і тэмамі выступленняў можна па спасылцы.
Матэрыял прадастаўлены аддзелам сувязей з грамадскасцю.